ފިނޭންސް މިނިސްޓްރީން ޕެންޝަން އޮފީހަށް 2.4 ބިލިއަން ރުފިޔާގެ ބޮންޑު އިންވެސްޓް ކޮށްގެން ޕެންޝަން ފަންޑަށް ގެއްލުމެއް ނުވާނެ ކަމަށް ޕެންޝަން އޮފީހުން ބުނެފިއެވެ.

ޕެންޝަން އޮފީހުން ނެރުނު ބަޔާނުގައި ބުނީ ފިނޭންސުން ހުށަހެޅި ޕްރޮޕޯސަލަކީ ދިވެހި ރުފިޔާ އާއި ޑޮލަރުން ރިޓާން ނުވަތަ ފައިދާ ލިބޭ އިންވެސްޓްމެންޓެއް ކަމަށާއި އެ ބޮންޑަށް އިންވެސްޓްކުރަނީ މިހާތަނަށް އެ އިދާރާއިން އިންވެސްޓްކޮށްފައިވާ ބޮންޑް ސެކިއުރިޓީ މާކެޓުގައި ވިއްކާލުމަށް ފަހު ލިބުނު ފައިސާއިން ކަމަށެވެ.

ފިނޭންސް މިނިސްޓްރީގެ 2.4 ބިލިއަން ރުފިޔާގެ ބޮންޑަކަށް އިންވެސްޓު ކުރުމުން، ބާޒާރުން ބޭރު ފައިސާ ގަންނަން ނުޖެހި، ޕެންޝަން ފަންޑުގައި ބޭރު ފައިސާގެ ރިޒާވެއް އުފެދިގެންދާނެ ކަމަށް ބަޔާނުގައި ބުނެފައިވެއެވެ.

ޕެންޝަން އޮފީހުގެ ބަޔާނުގައި ބުނެފައިވަނީ ސަރުކާރުގެ 2.4 ބިލިއަން ރުފިޔާގެ ބޮންޑުގައި އިންވެސްޓްކުރަނީ މޯލްޑިވްސް ރިޓަޔަމެންޓް ޕެންޝަން ސްކީމުގެ ދުރު ރާސްތާ އިންވެސްޓްމެންޓް ސްޓްރެޖެޓީ ހެދުމުގައި އުޅޭ ކޮންސަލްޓެންޓުންގެ ލަފާއާ އެކު ކަމަށެވެ.

މި މުއާމަލާތް ހިންގުމަށް ޕެންޝަން ފަންޑުގައި ސަރުކާރުގެ ބޮންޑުގެ ގޮތުގައި ހުރި 2.4 ބިލިއަން ރުފިޔާ އެމްއެމްއޭއަށް ވިއްކާނެއެވެ. އެ ލިބޭ ފައިސާއިން އަނެއްކާވެސް ޕެންޝަން އޮފީހުން ސަރުކާރުން 2.5 ބިލިއަން ރުފިޔާގެ ބޮންޑެއް ގަންނަނީއެވެ.

މިއީ ގެއްލުން ބޮޑު މުއާމަލާތެއް ކަމަށް ބުނެ ޕެންޝަން ބޯޑުގެ ޗެއާމަނަކަށް ހުންނެވި އަހުމަދު އިނާޒާއި އެ ބޯޑުގައި ޕްރައިވެޓު ސެކްޓާ ތަމްސީލުކުރައްވަން ހުންނެވި އަހުމަދު ސަރުވަޝް އާދަމް ވަނީ އެ ބޯޑުން އިސްތިއުފާ ދެއްވާފަ އެވެ.

އިނާޒާއި ސަރުވަޝް ވެސް ވިދާޅުވީ ދައުލަތުގެ މާލީ ހާލަތު މިހާ ގޯސް ދަނޑިވަޅެއްގައި މި މުއާމަލާތުގެ ސަބަބުން ކައިރި އަދި ދުރު މުސްތަގުބަލުގައި ވެސް ނުރަނގަޅު އަސަރުތައް ކުރާނެ ކަމަށެވެ.