ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)އިން މުޅި ރާއްޖޭއަށް ހުޅުވާލައިގެން ކުރިއަށް ގެންދާ ރާއްޖެ ސުޕަރ ލީގުގެ ފައިނަލުން ލ.މައިބައިދޫ އާއި ލ.ގަމުން ޖާގަ ހޯދައިފިއެވެ.

ލ. އަތޮޅަށް ނިސްބަތް ދެ ޓީމުގެ ތެރެއިން ފައިނަލްގެ ފުރަތަމަ ޖާގަ ކަށަވަރު ކުރީ މައިބައިދޫ އިންނެވެ. މައިބައިދޫން ޖާގަ ހޯދީ އިއްޔެ ހަވީރު ށ. ފުނަދޫއާ އެކު ކުޅެގެން ސީދާ 3 ސެޓުން މެޗު ކާމިޔާބުކޮށްގެންނެވެ.

ފުރަތަމަ ސެޓު މާބައިދޫއިން ކާމިޔާބުކުރީ 25-14 އިންނެވެ. އަދި ދެވަނަ ސެޓު 25-19 އިން ކާމިޔާބުކުރިއިރު ތިންވަނަ ސެޓު ގެންދިޔައީ 25-15 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ މާބައިދޫގެ ޖޫޒާން ޒަރީރެވެ.

ގަން ފައިނަލަށް ދަތުރުކުރީ ސެމީގައި ކ. ހުރާގެ މައްޗަށް 3-1 ސެޓުން ކުރި ހޯދައިގެންނެވެ. އެގޮތުން ފުރަތަމަ ފުރަތަމަ ސެޓު ވަރަށް ގާތް ގާތުގައި ދެ ޓީމުން ވެސް ޕޮއިންޓް ނަގަމުން ގޮސް ގަން ކުރި ހޯދީ 26-24 އިންނެވެ.

ދެ ސެޓުގައި ގަމަށް ހެދުނު ގޯސްތަކުގެ ފައިދާ ނަގައި ހުރާއިން ފަސޭހަ ކަމާއެކު 11-25 ވަނީ މި ސެޓު ގެންގޮސްފައެވެ.

ތިންވަނަ ސެޓާއި ހަތަރުވަނަ ސެޓު ގަމުން ކާމިޔާބުކޮށްފައިވަނީ 25-18 އަދި 25-16 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ގަމުގެ ބިދޭސީ ކުޅުންތެރިޔާ މިންކަން ވިޕާދާއެވެ.

މުބާރާތުގެ ތިންވަނަ ހޮވާ މެޗު ކުޅޭނީ ހޯމަ ދުވަހުގެ ހަވީރު 16:15 ގައެވެ. އަދި ފައިނަލް މެޗު ކުޅޭނީ އެ ރޭ 20:25 ގައެވެ.