ލީބިޔާގެ ކުރީގެ ލީޑަރު މުޢައްމަރުލް ގައްޒާފީގެ އެންމެ ނުފޫޒުގަދަ ދަރިކަލުން ސައިފުލް އިސްލާމް ގައްޒާފީ، ލީބިޔާގައި އަވަހާރަކޮށްލާފައިވާ ކަމަށް އެ ގައުމުގެ އޮފިޝަލުންނާއި މީޑިއާތަކުން ރިޕޯޓްކޮށްފިއެވެ.

އުމުރުން 53 އަހަރުގެ ސައިފުލް އިސްލާމް އަވަހާރަވިކަން އޭނާގެ ގާނޫނީ ވަކީލު ޚާލިދު އަލް-ޒައިދީ އާއި ސިޔާސީ މުޝީރު ޢަބްދުﷲ އުޘްމާން، އަންގާރަ ދުވަހު ފޭސްބުކް މެދުވެރިކޮށް ވަނީ ކަށަވަރުކޮށްދީފައެވެ. ނަމަވެސް މި ހާދިސާއާ ގުޅޭ އިތުރު ތަފްސީލެއް އެ ބޭފުޅުން ހާމަކުރައްވާފައެއް ނުވެއެވެ.

ލީބިޔާގެ "ފަވާސިލް މީޑިއާ" އިން ރިޕޯޓްކޮށްފައިވާ ގޮތުގައި، ސައިފުލް އިސްލާމް އަވަހާރަކޮށްލާފައިވަނީ ވެރިރަށް ޓްރިޕޮލީއާ ގާތްގަނޑަކަށް 136 ކިލޯމީޓަރު (85 މޭލު) ދުރުގައި އޮންނަ ޒިންތާން އަވަށުގައި ހުންނަ އޭނާގެ އަމިއްލަ ގޭގައި ހަތިޔާރު އެޅި ބަޔަކު ދިން ހަމަލާއެއްގައެވެ.

ސައިފުލް އިސްލާމްގެ ސިޔާސީ ޓީމުން ނެރުނު ބަޔާނެއްގައި ބުނެފައިވަނީ، މޫނު ނިވާކޮށްގެން ތިބި ހަތަރު މީހަކު އޭނާގެ ގެއަށް ވަދެގަނެ، "ނުލަފާ ޚިޔާތްތެރި އަދި ފިނޑި" ހަމަލާއެއްގައި އޭނާ އަވަހާރަކޮށްލާފައިވާ ކަމަށެވެ. މި ހަމަލާގެ ތެރޭގައި އޭނާ އެ މީހުންނާ ކުރިމަތިލެއްވި ކަމަށާއި، ހަމަލާ ދިން މީހުން ވަނީ އެ މީހުންގެ ޖަރީމާގެ ހެކި ފޮރުވުމުގެ ގޮތުން ގޭގައި ހުރި ސެކިއުރިޓީ ކެމެރާތައް ނިއްވާލާފައި ކަމަށްވެސް އެ ބަޔާނުގައިވެއެވެ.

ލީބިޔާގެ ބައިނަލްއަގުވާމީ ގޮތުން ބަލައިގަންނަ "ހައި ސްޓޭޓް ކައުންސިލް" ގެ ކުރީގެ ރައީސް ޚާލިދު އަލް-މިޝްރީ ވަނީ، މި މަރުގެ ހާދިސާއާ ގުޅޭގޮތުން އަވަސް އަދި ދެފުށް ފެންނަ ތަހުގީގެއް ހިންގުމަށް ގޮވާލައްވާފައެވެ.

ސައިފުލް އިސްލާމް ގައްޒާފީއަކީ ލީބިޔާގެ ސަރުކާރުގެ ރަސްމީ މަގާމެއް ފުރުއްވި ބޭފުޅެއް ނޫން ނަމަވެސް، 2000 ވަނަ އަހަރުން ފެށިގެން 2011 ވަނަ އަހަރާ ހަމައަށް އޭނާއަކީ ބައްޕާފުޅު މުޢައްމަރުލް ގައްޒާފީގެ އެންމެ އަރިސް އަދި ދެވަނައަށް އެންމެ ބާރުގަދަ ޝަޚްޞިއްޔަތު ކަމުގައި ބެލެވުނު ބޭފުޅެކެވެ. އޭނާގެ ބައްޕާފުޅު މުޢައްމަރުލް ގައްޒާފީ އަވަހާރަވީ 2011 ވަނަ އަހަރުގެ ދާޚިލީ ހަނގުރާމައިގެ ތެރޭގައި އިދިކޮޅު ހަނގުރާމަވެރިން ދިން ހަމަލާއެއްގައެވެ.

ލީބިޔާގެ އިދިކޮޅު ފަރާތްތަކުން އެ ގައުމުގެ ވެރިރަށް ތުރިޕޮލީ ހިފުމާ ގުޅިގެން، ގައުމުން ފިލަން އުޅެނިކޮށް 2011 ވަނަ އަހަރު ސައިފުލް އިސްލާމް ގައްޒާފީ ހައްޔަރުކޮށް ޒިންތާނުގައި ބަންދުކުރެވުނެވެ. އޭނާ މިނިވަންވީ 2017 ވަނަ އަހަރު އިއުލާނުކުރި އާންމު މައާފެއްގެ ދަށުންނެވެ. އޭގެ ފަހުން އޭނާ ދިރިއުޅެމުން ދަނީ ޒިންތާނުގައެވެ.

1972 ވަނަ އަހަރުގެ ޖޫން މަހު ތުރިޕޮލީއަށް އުފަންވި ސައިފުލް އިސްލާމަކީ، ލީބިޔާގައި ގިނަ ދުވަސްތަކެއް ވަންދެން ވެރިކަން ކުރެއްވި މުއައްމަރުލް ގައްޒާފީގެ ދެވަނަ ފިރިހެން ދަރިފުޅެވެ.

ހުޅަނގުގެ ގައުމުތަކުން ތައުލީމު ހާސިލުކުރައްވާފައިވާ، މުއާމަލާތްކުރުމުގެ ހުނަރު ލިބިވަޑައިގެންފައިވާ ސައިފުލް އިސްލާމަކީ، އޭނާގެ ބައްޕަގެ ހަރުކަށި ސަރުކާރުގެ ތެރެއިން ފެނުނު ޒަމާނީ އަދި އިސްލާހީ މޫނެވެ. 2000 ވަނަ އަހަރުގެ ކުރީކޮޅުން ފެށިގެން، ލީބިޔާއާއި ހުޅަނގުގެ ގައުމުތަކާ ދެމެދު އޮތް ގުޅުން އިއާދަކުރުމުގައި އޭނާ ވަނީ އިސް ދައުރެއް އަދާކުރައްވާފައެވެ.

ލަންޑަން ސްކޫލް އޮފް އިކޮނޮމިކްސްއިން މަތީ ތައުލީމު ހާސިލުކުރައްވާފައިވާ، އިނގިރޭސި ބަހަށް ފަރިތަ ސައިފުލް އިސްލާމަކީ، ގައުމަށް ގާނޫނުއަސާސީއަކާއި އިންސާނީ ހައްގުތަކަށް އިހުތިރާމުކުރުން ބޭނުންވާކަމަށް ބުނެ، އިސްލާހަށް ވަކާލާތުކުރެއްވި ބޭފުޅެކެވެ. އޭނާގެ ޕީ.އެޗް.ޑީ ތީސީސް ބިނާކޮށްފައިވަނީ ދުނިޔޭގެ ހިންގުން އިސްލާހުކުރުމުގައި މަދަނީ ޖަމިއްޔާތަކުގެ ދައުރާ ބެހޭގޮތުންނެވެ.

ނަމަވެސް، 2011 ވަނަ އަހަރު އޭނާގެ ބައްޕަގެ ދިގު ވެރިކަމާ ދެކޮޅަށް ރައްޔިތުން ނުކުތުމުން، ސައިފުލް އިސްލާމް އިސްކަންދިނީ އޭނާގެ އާއިލާއާއި ގަބީލާގެ ވަފާތެރިކަމަށެވެ. އިދިކޮޅު ފަރާތްތަކަށް "މީދާ" ފަދަ ދަށު ދަރަޖައިގެ ނަންނަމުން މުޚާތަބުކޮށް، އެމީހުންގެ އަޑު ކަނޑުވާލުމަށް ހިންގި އަނިޔާވެރި އަމަލުތަކުގެ އެންމެ އިސް އެއް ސިކުނޑިއަކަށް އޭނާ ވެގެންދިޔައެވެ.

އިދިކޮޅު ހަނގުރާމަވެރިން ވެރިރަށް ތުރިޕޮލީ ހިފުމުން، ސައިފުލް އިސްލާމް މަސައްކަތްކުރީ ބެދަވީ ދަރިކޮޅުގެ މީހެއްގެ ސިފަ ޖެހިގެން އަވަށްޓެރި ނައިޖަރަށް ފިލާށެވެ. ނަމަވެސް، ސަހަރާގެ ތެރެއިން ދަތުރުކުރަނިކޮށް "އަބޫ ބަކުރުއް ސިއްދީގު ބްރިގޭޑް"ގެ ހަނގުރާމަވެރިން އޭނާ ހައްޔަރުކޮށް، ވައިގެ މަގުން ޒިންތާނަށް ގެންދިޔައެވެ.