ފަސް އަހަރުގެ ދައުރެއްގެ ތެރޭގައި ތިން އިންތިޚާބު އޮތުމުން ދައުލަތް އޮންނަނީ އިންތިޚާބީ ހުމެއްގެ ތެރޭގައި ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެކުގައި ބޭއްވުމާ ގުޅޭގޮތުން ރައްޔިތުންގެ ޚިޔާލު ހޯދުމަށް ނަގާ ވޯޓު ކުރިއަށް އޮތް ކައުންސިލް އިންތިޚާބާއެކު ބޭއްވުމަށް ސަރުކާރުން ކުރަމުންދާ މަސައްކަތާ ގުޅުވައި އާދަމް ކުރެއްވި ޕޯސްޓެއްގައި ވިދާޅުވީ ދައުރެއްގެ ތެރޭ ބާއްވާ އިންތިޚާބުތަކުގެ ސަބަބުން ދައުލަތް އޮންނަނީ އިންތިޚާބީ ހުމެއްގެ ތެރޭގައި ކަމަށެވެ.

އާދަމް ވިދާޅުވީ ދައުރެއްގެ ތެރޭގައި 3 އިންތިޙާބު ބޭއްވުމުގެ ސަބަބުން ޤައުމީ އުފެއްދުންތެރި ކަމަށް މަސައްކަތް ކުރުމަށް ލިބޭ ވަގުތުން ބޮޑު ބައެއް ކެންޕެއިންތަކަށް  ހޭދަ ކުރަންޖެހޭ ކަމަށާއި އޭގެ ސަބަބުން ބޮޑު ޚަރަދެއް ހިނގާ ކަމަށެވެ.

ރާއްޖޭގައި ރިޔާސީ އިންތިޙާބާއި މަޖިލިސް އިންތިޙާބު، އެކުގައި ބޭއްވުމަކީ މުޅި ޤައުމުގެ މަޞްލަޙަތު ހިމެނޭ، ވަރަށް ބޭނުންތެރި ކަމެއް ކަމަށް އާދަމް ވިދާޅުވިއެވެ.

މީގެ އިތުރުން ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެކުގައި ބޭއްވުމާ ގުޅޭގޮތުން ޤާނޫނުއަސާސީއަށް ހުށަހަޅާފައިވާ އިސްލާހާ ގުޅިގެން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަ ދައްކަވަމުން އާދަމް ވިދާޅުވީ ފެންނަ ނުފެންނަ ވޯޓެއް ބޭއްވުން އިތުރަށް ލަސްކުރުމުގެ ބޭނުމެއް ނެތް ކަމަށެވެ.

އާދަމް ވިދާޅުވީ ރިޔާސީ އިންތިހާބާއި މަޖިލިސް އިންތިހާބު އެއްކޮލުމާ ގުޅޭ ގޮތުން ރައްޔިތުން ހޭލުންތެރިކުރުމަށް ޕާޓީތަކަށް ވަގުތު ލިބުނު ކަމަށެވެ. އަދި ރައީސް މުހައްމަދު މުއިއްޒުގެ ވެރިކަމަށް ވެސް ދެ އަހަރަށް ވުރެ ގިނަ ދުވަސް ވޭތުވެގެން ދިޔައިރު ދެ އިންތިހާބު އެއްކޮށްލަން އުޅޭ އުޅުމަކީ ކުއްލިއަކަށް ސަރުކާރުން ކުރާ ކަމެއް ނޫން ކަމަށް އާދަމް ވިދާޅުވިއެވެ.

ސަރުކާރުތަކުގެ މުޅި ދައުރު ދަނީ އިންތިހާބުތަކަށް ކެމްޕެއިން ކުރުމުގައި ކަމަށާއި ސަރުކާރު އެކުލަވާލުމަށް ފަހު ފުރަތަމަ ހަ މަސްދުވަހު ރައީސުލްޖުމްހޫރިއްޔާ އުޅުއްވަން ޖެހެނީ ރައްޔިތުންގެ މަޖިލީހުގެ އެތެރޭގައި އޮންނަ އޮއިވަރެއްގެ ތެރޭގައި ކަމަށް އާދަމް ވިދާޅުވިއެވެ.

"އިދިކޮޅު ޕާޓީގެ މެންބަރުން މަޖިލީހުގައި ގިނަވެއްޖެއްޔާ ރައީސުލްޖުމްހޫރިއްޔާ އަޒުލުކުރަން އުޅުމަކީ ވެސް މި ވޭތުވެދިޔަ މާޒީގައި ފެނުނު ކަމެއް،" އާދަމް ވިދާޅުވިއެވެ.

ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލައި، މިހާރު ހިނގަމުންދާ މަޖިލީހުގެ ދައުރު ކުރު ކުރުމަށް ގާނޫނުއަސާސީ ބަދަލުކުރުމަށް ސަރުކާރުގެ ފަރާތުން މަޖިލީހަށް ހުށަހެޅީ ޖެނުއަރީ 4، ގަ އެވެ.

މި ގޮތަށް މަޖިލީހުގެ ދައުރު ފެއްތުމަށް މީގެ ފަހުން އަލަށް ހޮވާ މަޖިލީހުގެ ފުރަތަމަ ޖަލްސާ ބާއްވަން ޖެހޭ ތާރީހު ޑިސެމްބަރު 1، އަށް ބަދަލުކުރަން އެ ބިލުގައި ހިމަނާފައިވެ އެވެ. އެއާއެކު މިހާރު އޮތް 20 ވަނަ ރައްޔިތުންގެ މަޖިލީހުގެ ދައުރުން ހަ މަސް މަދުވާނެ އެވެ.