ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެކުގައި ބޭއްވުމާ ގުޅޭގޮތުން ރައްޔިތުންގެ ޚިޔާލު ހޯދުމަށް ނަގާ ވޯޓު ކުރިއަށް އޮތް ކައުންސިލް އިންތިޚާބާއެކު ބޭއްވުމަކީ އެންމެ ރަނގަޅު ގޮތްކަމަށް ބަންޑާރަނައިބު އަލްއުސްތާޛް އަހުމަދު އުޝާމް ވިދާޅުވެއްޖެއެވެ.

ދެ އިންތިޚާބު އެކުގައި ބޭއްވުމަށް ޤާނޫނުއަސާސީއަށް ހުށަހަޅާފައިވާ އިސްލާހާ ގުޅިގެން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަފުޅު ދައްކަވަމުން އުޝާމް ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމުން ރައްތުންނަށް ގިނަ ފައިދާތަކެއް އެބަހުރި ކަމަށެވެ.

ރައްޔިތުންގެ ޚިޔާލުހޯދުމަށް ނަގާ ވޯޓާ ގުޅޭ ޤާނޫނުގައި ބަޔާންކޮށްފައިވާގޮތަށް މަދުވެގެން 45 ދުވަހުގެ މުއްދަތެއް ވޯޓު ނެގުމަށް އިލެކްޝަންސް ކޮމިޝަނަށް ދޭންޖެހޭކަން ފާހަގަކުރައްވައި އުޝާމް ވިދާޅުވީ މި ބިލަކީ ސަރުކާރުން ގިނަ މަޝްވަރާތަކާއެކުގައި ހުށަހެޅި ބިލެއް ކަމަށެވެ. އެފަދަ ވޯޓެއް ނެގުމަށް ގާނޫނީ ހުރަހެއް ނެތް ކަމަށާއި 45 ދުވަހަކީ އެފަދަ އިންތިޚާބެއް ބާއްވަން އެކަށީގެންވާ މުއްދަތެއް ކަމަށެވެ.

އުޝާމް ވިދާޅުވި ގޮތުގައި ޚަރަދުތަކަށް ބަލާއިރު އެންމެ ރަނގަޅީ ޤާނޫނުން ދޭން ޖެހޭ މުއްދަތު ދިނުމަށްފަހު ކުރިއަށް އޮތް 2 އިންތިޚާބާއެކު ރިޔާސީ އިންތިޚާބާއި މަޖިލިސް އިންތިޚާބު އެކުގައި ބޭއްވުމާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓު ނެގުމެވެ.

މިހާރު އަމަލުކުރަމުންދާ ޤާނޫނުއަސާސީގައި އެންމެ ފުރަތަމަ ބާއްވާ މަޖިލީހަކީ 25 ފެބްރުއަރީގައި ބާއްވަން ޖެހޭ އިންތިޚާބެއްކަން ބަޔާންކޮށްފައިވާކަން ފާހަގަކުރައްވައި ބަންޑާރަނައިބު އަލްއުސްތާޛް އަހުމަދު އުޝާމް ވިދާޅުވީ ޤާނޫނުއަސާސީ އިސްލާހު ކުރިއިރު ދެ އިންތިޚާބު ދުރުކުރުމަކީ އެއްވެސް އިރެއްގައި ގެންގުޅެފައިވާ ވިސްނުމެއް ނޫން ކަމަށެވެ.