ޕާކިސްތާނުގެ ބަލޮޗިސްތާނު ޕްރޮވިންސްގައި ދިން ސިލްސިލާ ހަމަލާތަކަކާ ގުޅިގެން، އެ ސަރަހައްދުގައި ހިންގި ހާއްސަ އޮޕަރޭޝަނެއްގައި މަދުވެގެން 145 ހަނގުރާމަވެރިން މަރާލާފައިވާ ކަމަށް އެ ގައުމުގެ ސަލާމަތީ ބާރުތަކުން ބުނެފިއެވެ. މި ހަމަލާތަކުގައި ގާތްގަނޑަކަށް 50 މީހުން ވަނީ މަރުވެފައެވެ.

އާދީއްތަ ދުވަހު މިކަން އިއުލާނުކޮށްފައިވަނީ، ހޮނިހިރު ދުވަހުގެ ހެނދުނު ބަލޮޗިސްތާނުގެ އެކި ސަރަހައްދުތަކަށް ދިން ބޮމުގެ އަދި ބަޑީގެ ހަމަލާތަކަށްފަހުއެވެ. މި ހަމަލާތަކުގައި 31 އާންމުންނާއި ސަލާމަތީ ބާރުތަކުގެ 17 މީހަކު ވަނީ މަރުވެފައެވެ.

މަނާކޮށްފައިވާ ވަކިވެގަތުމަށް މަސައްކަތްކުރާ ޖަމާއަތެއް ކަމަށްވާ ބަލޮޗިސްތާން ލިބަރޭޝަން އާމީ (ބީ.އެލް.އޭ) އިން ޒިންމާ އުފުލާފައިވާ މި ހަމަލާތަކާ ގުޅިގެން، ކަމާބެހޭ ފަރާތްތަކުން ވަނީ އެ ސަރަހައްދުގައި ސަލާމަތީ ފިޔަވަޅުތައް ވަރުގަދަކޮށް، އެއްވުންތަކާއި މުޒާހަރާތައް ބޭއްވުން މަނާކޮށް، ދަތުރުފަތުރު ކުރުން ކޮންޓްރޯލްކޮށްފައެވެ.

ޑޯން ނޫހުން ރިޕޯޓުކޮށްފައިވާ ގޮތުގައި، މި ފިޔަވަޅުތަކުގެ ދަށުން އާންމު ތަންތަނުގައި މީހާ ކާކުކަން ނޭނގޭ ގޮތަށް މޫނު ނިވާކުރުން ވެސް ވަނީ މަނާކޮށްފައެވެ.

ބަލޮޗިސްތާނުގެ ޗީފް މިނިސްޓަރު ސަރުފުރާޒް ބުގްޓީ ކުއެޓާގައި ނޫސްވެރިންނަށް މައުލޫމާތު ދެއްވަމުން ވިދާޅުވީ، ސަރުކާރުން "ފިތުނަ އަލް ހިންދުސްތާން" ގެ ނަމުން ނިސްބަތްކުރާ ބީ.އެލް.އޭ ގެ 145 މީހަކު ސިފައިންނާއި ފުލުހުން ގުޅިގެން މަރާލާފައިވާ ކަމަށެވެ. އަދި ފާއިތުވި ދެ ދުވަހު މަރާލި ހަނގުރާމަވެރިންގެ އަދަދަކީ ފާއިތުވި އެތައް އަހަރެއްގެ ތެރޭގައި އެންމެ ގިނަ އަދަދެއްގެ ހަނގުރާމަވެރިން މަރާލި ފަހަރު ކަމަށްވެސް އޭނާ ވިދާޅުވިއެވެ.

ޕާކިސްތާނު ސިފައިން ބުނި ގޮތުގައި ހޮނިހިރު ދުވަހު 92 ހަނގުރާމަވެރިން އަދި ހުކުރު ދުވަހު 41 ހަނގުރާމަވެރިން ވަނީ މަރާލާފައެވެ.

މީގެ އިތުރުން ބުގްޓީ ވަނީ އަފްޣާނިސްތާނުން މި ހަމަލާތަކަށް އެހީތެރިވާ ކަމަށް ތުހުމަތުކުރައްވައި، ބީ.އެލް.އޭ ގެ އިސްވެރިން ހަރަކާތްތެރިވަނީ އަފްޣާނިސްތާނުގެ ބިމުގައި ތިބެގެން ކަމަށް ވިދާޅުވެފައެވެ. ނަމަވެސް އިންޑިއާއާއި އަފްޣާނިސްތާނުން ވަނީ މި ތުހުމަތުތައް ދޮގުކޮށްފައެވެ.