އީރާނުގެ ރޫޙާނީ އިސްލީޑަރު އަލީ ޚާމަނާއީ ވަނީ، އެމެރިކާގެ ރައީސް ޑޮނަލްޑް ޓްރަމްޕް މެދުއިރުމައްޗަށް އަސްކަރީ ބާރުތައް ޖަމާކުރައްވަމުން ގެންދަވާ ދަނޑިވަޅެއްގައި، އީރާނަށް އެއްވެސް ހަމަލާއެއް ދީފިނަމަ އޭގެ ނަތީޖާއަކީ މުޅި ސަރަޙައްދަށް ފެތުރިގެންދާނެ ބޮޑު ހަނގުރާމައަކަށް ވެގެންދާނެ ކަމަށް ވިދާޅުވެ އެމެރިކާއަށް އިންޒާރު ދެއްވާފައެވެ.

އީރާނުގައި 37 އަހަރު ވަންދެން އެންމެ މަތީ ބާރުވެރިކަން ދަމަހައްޓަވަމުން ގެންދަވާ، އުމުރުފުޅުން 86 އަހަރުގެ ރޫޙާނީ ލީޑަރު، ތެހެރާންގައި އާދީއްތަ ދުވަހު ބޭއްވި ރަސްމިއްޔާތެއްގައި ވިދާޅުވީ، މިފަހަރު އެމެރިކާއިން ހަނގުރާމައެއް ފަށައިފިނަމަ، އެކަން ވެގެންދާނީ މުޅި ސަރަޙައްދަށް ފެތުރިގެންދާނެ ހަނގުރާމައަކަށްކަން އެމެރިކާއިން ދަންނަންޖެހޭނެ ކަމަށެވެ.

ޚާމަނާއީ މިމޭރުމުން ވާހަކަފުޅު ދެއްކެވީ، 1979 ވަނަ އަހަރު ފަރަންސޭސިވިލާތުގައި އަރުވާލެވިގެން ހުންނެވުމަށްފަހު އާޔަތުﷲ ރުހުﷲ ޚުމައިނީ އެނބުރި ވަޑައިގެންނެވި ހަނދާނީ މުނާސަބަތު ފާހަގަކުރުމަށް އެއްވި ގިނަ އަދަދެއްގެ ސަޕޯޓަރުންނާ މުޚާތަބު ކުރައްވަމުންނެވެ.

އެ ދަތުރުފުޅަކީ އީރާނުގެ އިންގިލާބަށް މަގުފަހިވެ، އޭރު އެމެރިކާގެ ތާއީދާއެކު ވެރިކަން ކުރެއްވި މުޙައްމަދު ރިޒާ ޝާހު ފަހުލަވީ ގައުމުން ފިލައިގެން ދާންޖެހުނު މައިގަނޑު ސަބަބެވެ.

ޚާމަނާއީ އިތުރަށް ވިދާޅުވީ، އެމެރިކާގެ ބޭނުމަކީ އީރާނުގެ މުއްސަނދި ތެލާއި ގޭހުގެ ވަސީލަތްތަކުގެ މައްޗަށް އަތްގަދަކުރުން ކަމަށެވެ. އަދި ދާދިފަހުން އެގައުމުގައި ހިނގާދިޔަ ސަރުކާރާ ދެކޮޅު މުޒާހަރާތަކަކީ، ސަރުކާރުގެ އޮފީސްތަކާއި ބޭންކުތަކާއި މިސްކިތްތަކަށް ހަމަލާދީފައިވާތީ، އެއީ ބަޣާވާތެއް ފަދަ ކަމެއްގެ ގޮތުގައި އެމަނިކުފާނު ސިފަކުރެއްވިއެވެ.

މި ހަމަނުޖެހުންތަކަކީ "ފިތުނައެއް" ކަމަށް ވިދާޅުވެ، 2009 ވަނަ އަހަރުގެ ގްރީން މޫވްމަންޓާއި އެނޫންވެސް އެފަދަ މުޒާހަރާތަކަށް ކުރިން ބޭނުންކުރެއްވި ބަސްމަގު މިފަހަރުވެސް ވަނީ ބޭނުންކުރައްވާފައެވެ.

ޚާމަނާއީގެ ވާހަކަފުޅަށްފަހު، ރައީސް ޓްރަމްޕް ވިދާޅުވީ އީރާނުން އެއްބަސްވުމަކަށް އަންނާނެ ކަމަށް އުއްމީދު ކުރައްވާ ކަމަށެވެ. ރޫޙާނީ ލީޑަރުގެ އިންޒާރާ ގުޅޭގޮތުން ނޫސްވެރިން ސުވާލުކުރުމުން ޓްރަމްޕް ވިދާޅުވީ، އެމަނިކުފާނު އެފަދަ ވާހަކައެއް ދައްކަވާނެކަން ކުރިންވެސް އެނގޭ ކަމަށެވެ. އަދި އުއްމީދަކީ އެއްބަސްވުމަކަށް އާދެވުން ކަމަށާއި، އެއްބަސްވުމަކަށް ނާދެވިއްޖެނަމަ، ޚާމަނާއީ ދެއްކެވި ވާހަކަފުޅުގެ ތެދުދޮގު ހާމަވެގެންދާނެ ކަމަށްވެސް ޓްރަމްޕް ވިދާޅުވިއެވެ.