ކ. ތިލަފުށިން ގެއްލިގެން ހޯދަމުން ދަނިކޮށް މަރުވެފައި އޮއްވާ ފެނުނު ބިދޭސީ މީހާގެ މައްސަލައިގައި ސްރީލަންކާ މީހަކު ހައްޔަރުކޮށްފި އެވެ.

ފުލުހުން ބުނީ ތިލަފުށި ވެމްކޯ ސައިޓުގައި މަސައްކަތްކުރާ އަމީން މިއާ، 24، މަރުވީ ޖެނުއަރީ 26، ގެ މެންދުރުގެ ވަގުތެއްގައި ކުނި ޖަމާކޮށްފައިވާ ސައިޓްގެ ބައެއްގައި ކޮންނަބޯޓަކުން ކުނި ނެގުމުގެ މަސައްކަތް ކުރަމުންދަނިކޮށް، އޭގެ ދަތްގަނޑުން ޖެހި ވެއްޓިގެން ކަމަށެވެ.

އަމީން މިއާ މަރުވާން މެދުވެރިވީ ހުސްވި ޖެނުއަރީ މަހުގެ 26 ވީ ހޯމަ ދުވަހުގެ މެންދުރުގެ ވަގުތެއްގައި، ތިލަފުށީ ސައިޓުގައި އެކްސްކެވޭޓަރަކުން ކުނި ނެގުމުގެ މަސައްކަތްކުރަނިކޮށް، އޭގެ ދަތްގަނޑުން ޖެހި ވެއްޓި، އެ އެކްސްކެވޭޓަރުން ކުނިތައް އެތަނުގެ ކައިރިން އެހެން ދިމާލަކަށް ބަދަލު ކުރުމުގެ ތެރޭގައި އެ މީހާގެ ހަށިގަނޑާއެކު ކުނިތައް ބަދަލުކުރެވި މީހާގެ ގައިމައްޗަށް ކުނިތަކެއް އެޅިގެން ކަމަށް ފުލުހުން ބުނެއެވެ.

މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކުރީ ކޮންނަ ބޯޓު ދުއްވަން ހުރި 32 އަހަރުގެ ސްރީލަންކާ މީހާ އެވެ.

އަމީން، 24، މަރުވެފައި އޮއްވައި މިދިޔަ ބުދަ ދުވަހު ފެނުނީ، އޭނާ ގެއްލިފައިވާ ކަމަށް ބުނެ އޭގެ އަނެއް ދުވަހު ކުރި ރިޕޯޓަކާ ގުޅިގެން ހޯދަމުން ދަނިކޮށެވެ.