ލީޑްސް ޔުނައިޓެޑް އަތުން މޮޅުވެ، އިނގިރޭސި ޕްރިމިއާ ލީގުގައި އެންމެ ފަހުން ކުޅުނު ހަތަރު މެޗުން ފުރަތަމަ ފަހަރަށް މޮޅުވި އާސެނަލްއިން ތާވަލުގެ އެއްވަނައިގައި ހަތް ޕޮއިންޓުގެ ލީޑެއް ކަށަވަރުކުރިއިރު، މި މެޗުގައި ނޯނީ މާޑުއެކޭ ވަނީ ފާހަގަކޮށްލެވޭ މޮޅު ކުޅުމެއް ދައްކާފައެވެ.
މާޑުއެކޭއަކީ އަސްލު މި މެޗުގެ ފުރަތަމަ އެގާރައިގައި ހިމެނޭ ކުޅުންތެރިއެއް ނޫނެވެ. އޭނާ ކުޅެން އެރީ މެޗުގެ ކުރިން ކުރިއަށްދިޔަ ފަރިތަކުރުންތަކުގެ ތެރޭގައި އުނަގަނޑަށް ލިބުނު އަނިޔާއަކާ ގުޅިގެން ކުޅުމާ ދުރަށްދާން ޖެހުނު ވިންގަރ ބުކާޔޯ ސަކާގެ ބަދަލުގައެވެ.
މި ސީޒަނުގެ ބޮޑުބައިގައި ބަދަލު ކުޅުންތެރިއެއްގެ ގޮތުގައި ފެނިގެންދިޔަ މާޑުއެކޭއަށް ލިބުނު މި ފުރުސަތުގެ ބޭނުން އޭނާ ވަރަށް ފުރިހަމައަށް ހިފިއެވެ. އެގޮތުން އޭނާ ނަގައިދިން ހިތްގައިމު ހުރަހަކުން މާޓިން ޒުބިމެންޑީ ވަނީ ބޮލުން ގޯލެއް ޖަހައި އާސެނަލްއަށް މެޗުގެ ކުރިހޯދައިދީފައެވެ.
މެޗުގެ ފެށުން ލީޑްސްއިން ރަނގަޅު ކުރި ނަމަވެސް، ފުރަތަމަ ހާފުގެ ބޮޑުބައިގައި އާސެނަލްއިން ވަނީ ލީޑްސްގެ ފަހަތަށް ބާރުބޮޑުކޮށްފައެވެ. ގިނަ ކޯނަރުތަކާއި ތްރޯ-އިންތަކެއް ހޯދައި، އާސެނަލްއިން ލީޑްސްގެ ޑިފެންސަށް ނުފޫޒު ފޯރުވިއެވެ. އާސެނަލްއިން އެޓީމުގެ ދެވަނަ ލަނޑު ކާމިޔާބުކުރީ ވެސް މިފަދަ ކޯނަރަކުންނެވެ. މާޑުއެކޭ ފޮނުވާލި ކޯނަރު ހުއްޓުވަން އުޅުމުގެ ތެރޭގައި، ލީޑްސްގެ ގޯލްކީޕަރު ކާލް ޑާލޯ އަތުން ބޯޅަ ވަނީ އަމިއްލަ ގޯލަށެވެ.
އޭގެ ފަހުން ގަބްރިއަލް މާޓިނެލީ ނަގައިދިން ހުރަހަކުން ވިކްޓަރ ގިޔޮކެރެސް ތިންވަނަ ލަނޑު ޖަހައި އާސެނަލްއަށް މެޗު ފަސޭހަކޮށްދިނެވެ. އަދި މެޗުގެ ފަހުކޮޅު ބަދަލު ކުޅުންތެރިއެއްގެ ގޮތުގައި ކުޅެން އެރި ގަބްރިއަލް ޖީސަސް ވަނީ ހަތަރުވަނަ ލަނޑެއް ޖަހައި ލީޑް އިތުރަށް ފުޅާކޮށްފައެވެ.
އެންމެ ފަހުން ކުޅުނު މެޗުތަކުގެ ނަތީޖާ ހުރިގޮތުން މި މެޗުން މޮޅުވުމަކީ އާސެނަލްއަށް ކޮންމެހެން މުހިންމު ކަމަކަށް އޮތީ ވެފައެވެ. މި މުހިންމު މޮޅާއެކު އާސެނަލްއިން ވަނީ، އާދީއްތަ ދުވަހު މެޗުތައް ކުޅެން ހަމަޖެހިފައިވާ ވާދަވެރި މެންޗެސްޓަރ ސިޓީއާއި އެސްޓަން ވިލާއަށް ބޮޑު ޕްރެޝަރެއް ކުރިމަތިކުރުވާފައެވެ.
