މިނެސޯޓާގައި ހިންގި އިމިގްރޭޝަން ރެއިޑެއްގެ ތެރެއިން ހައްޔަރުކުރި ފަސް އަހަރުގެ ފިރިހެން ކުއްޖަކާއި އޭނާގެ ބައްޕަ، ޓެކްސަސްގެ ބަންދުގައި ބޭތިއްބުމަށްފަހު ދޫކޮށްލުމަށް އެމެރިކާގެ ފެޑެރަލް ފަނޑިޔާރަކު އަމުރުކުރައްވައިފިއެވެ.

މި އަމުރު ނެރުއްވާފައިވަނީ އެ ދެބަފައިން ބަންދުކުރުމާ ގުޅިގެން އާންމުންގެ ބޮޑެތި ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ.

ހޮނިހިރު ދުވަހު ނެރުއްވި މި ނިންމެވުމުގައި، ޔޫއެސް ޑިސްޓްރިކްޓް ފަނޑިޔާރު ފްރެޑް ބިއަރީ ވަނީ ލިއަމް ކޮނޭޖޯ ރާމޯސް ބަންދުގައި ބެހެއްޓުމަކީ ޣައިރު ޤާނޫނީ ކަމެއް ކަމަށް ކަނޑައަޅުއްވާފައެވެ.

ބައެއް ފަރާތްތަކުން ބާރުގެ ބޭނުން ނަހަމަ ގޮތުގައި ހިފުމާއި، ރަހުމުކުޑަ އަމަލުތައް ހިންގަމުންދާ ދިއުން އެމަނިކުފާނު ވަނީ ވަރަށް ބޮޑަށް ކުށްވެރިކުރައްވާފައެވެ.

މި މައްސަލަ ހޫނުވެގެން ދިޔައީ، މިނިއަޕޮލިސްގެ ސަރަހައްދަކުން އިމިގްރޭޝަން އެންޑް ކަސްޓަމްސް އެންފޯސްމަންޓް (ICE) ގެ އޮފިސަރުން މި ކުއްޖާ ގެންދިޔައިރު، ނޫކުލައިގެ ތޮއްޕެއް އަޅައިގެން ސްޕައިޑަމޭން ދަބަހެއް ކޮނޑުގައި އަޅުވައިގެން ހުރި ފޮޓޯތަކެއް އާންމުވުމާ ގުޅިގެންނެވެ.

މި ފޮޓޯތައް ވެގެން ގޮސްފައިވަނީ ރައީސް ޑޮނަލްޑް ޓްރަމްޕްގެ ސަރުކާރުން ހިޖުރަވެރިންނާ ދެކޮޅަށް ފަށާފައިވާ ހަރުކަށި ފިޔަވަޅުތަކުގެ ރަމްޒަކަށެވެ.

“މި މައްސަލައަކީ ސަރުކާރުން ދުވާލަކު ވަކި އަދަދަކަށް މީހުން ޑީޕޯޓްކުރުމަށް ކަނޑައަޅާފައިވާ އަމާޒަށް ވާސިލްވުމަށްޓަކައި، އެއްވެސް ރޭވުންތެރިކަމެއް ނެތް ގޮތުގައި ހިންގާފައިވާ އަމަލެއް. މީގެ ސަބަބުން ކުޑަކުދިންނަށް ނަފްސާނީ ގޮތުން ބޮޑެތި އަސަރުތަކެއް ކުރި ނަމަވެސް އެކަމަށް ބެލުމެއް ނެތި ސަރުކާރުން ވަނީ މިކަން ކޮށްފައި،" ފަނޑިޔާރު ބިއަރީގެ ނިންމެވުމުގައި ލިޔުއްވާފައިވެއެވެ.

ސަރުކާރުން ކަނޑައަޅާފައިވާ ޑީޕޯޓްކުރުމުގެ ކޯޓާގެ ތަފްސީލެއް ފަނޑިޔާރު ހާމައެއް ނުކުރައްވައެވެ. ނަމަވެސް، ވައިޓް ހައުސްގެ ކުރީގެ ޗީފް އޮފް ސްޓާފް ފޯ ޕޮލިސީ ސްޓީވަން މިލާ މީގެ ކުރިން ވިދާޅުވެފައިވަނީ، ދުވާލަކު 3,000 ހިޖުރަވެރިން ހައްޔަރުކުރުމުގެ އަމާޒެއް ސަރުކާރުން ގެންގުޅޭ ކަމަށެވެ.

މިނިއަޕޮލިސްގެ ކޮލަމްބިއާ ހައިޓްސް ޕަބްލިކް ސްކޫލް ޑިސްޓްރިކްޓުން މައުލޫމާތު ދޭ ގޮތުގައި، މި މަހު އެ ސަރަހައްދުން އިމިގްރޭޝަން އޮފިސަރުން ހައްޔަރުކުރި ހަތަރު ދަރިވަރުންގެ ތެރޭގައި ލިއަމް ހިމެނެއެވެ.