ރަފަހް ބޯޑަރު އަލުން ހުޅުވުމަށް އެއް ދުވަހަށް ވެފައި ވަނިކޮށް، އިސްރާއީލުން ހުއްޓުމެއްނެތި ޣައްޒާއަށް ދެމުންދާ ހަމަލާތަކުގައި، ހަ ކުޑަކުދިންނާއި ފުލުހުން ހިމެނޭހެން މަދުވެގެން 31 ފަލަސްތީނު ރައްޔިތުން ޝަހީދުކޮށްލައިފިއެވެ.

މެޑިކަލް މަސްދަރުތަކާ ހަވާލާދީ އަލްޖަޒީރާއިން ރިޕޯޓްކޮށްފައިވާ ގޮތުގައި، ހޮނިހިރު ދުވަހު އިސްރާއީލުން ޚާން ޔޫނިސްގެ ހުޅަނގު އުތުރުގައި އޮންނަ އަލް-މަވާސީ ސަރަހައްދުގައި ހާލުގައި ޖެހިފައިވާ މީހުން ދިރިއުޅޭ ފޭލިގެއަކަށް ދިން ވައިގެ ހަމަލާއެއްގައި، ތިން ކުޑަކުދިން ހިމެނޭހެން މަދުވެގެން ހަތް މީހުން ޝަހީދުވިއެވެ.

ޝަހީދުވި މީހުންގެ ހަށިތައް މިހާރު ވަނީ ޚާން ޔޫނިސްގައި ހުންނަ ނާސިރު މެޑިކަލް ކޮމްޕްލެކްސްއަށް ގެންގޮސްފައެވެ.

ޣައްޒާ ސިޓީގެ ހުޅަނގުގައި އޮންނަ ރިމާލް އަވަށުގެ އެޕާޓްމަންޓް އިމާރާތަކަށް އިސްރާއީލުން ދިން ވައިގެ ހަމަލާއެއްގައި ތިން ކުޑަކުދިން ހިމެނޭހެން މަދުވެގެން ފަސް މީހުން ޝަހީދުވެފައިވާ ކަމަށް އެމަޖެންސީ ޚިދުމަތްތަކުން ވަނީ ރިޕޯޓްކޮށްފައެވެ.

މީގެ އިތުރުން ޣައްޒާ ސިޓީގެ ދަރަޖް އަވަށުގެ އެޕާޓްމަންޓް އިމާރާތަކަށް ދިން ހަމަލާއެއްގައި އަށް މީހަކު ވަނީ ޒަޚަމްވެފައެވެ.

ފަލަސްތީނު ރެފިއުޖީންނާ ބެހޭ އދ.ގެ އެޖެންސީ (އުންރުވާ) ގެ ވެރިޔާ ވަނީ އިސްރާއީލުގެ މި ފަހުގެ ހަމަލާތައް ކުށްވެރިކުރައްވައި، މިހާރު އޮތް ހަނގުރާމަ ހުއްޓާލުމުގެ އެއްބަސްވުމަކީ ހަމައެކަނި "ނަމެއްގައި އޮތް އެއްބަސްވުމެއް" ކަމަށް ސިފަކުރައްވާފައެވެ.

ހަނގުރާމަ ހުއްޓާލުމުގެ މެދުވެރިންގެ ގޮތުގައި ހަރަކާތްތެރިވާ މިޞްރާއި ޤަޠަރުން ވެސް ވަނީ އިސްރާއީލުން އެއްބަސްވުމާ ޚިލާފަށް ހިންގަމުންދާ އަމަލުތައް ކުށްވެރިކޮށްފައެވެ.

ޣައްޒާއާއި މިޞްރު ގުޅުވައިދޭ ރަފަހް ބޯޑަރު އާދީއްތަ ދުވަހު އަލުން ހުޅުވުމަށް ތައްޔާރުވަމުންދާތީ، ހުރިހާ ފަރާތްތަކަކުން ވެސް ކެތްތެރިކަން އިސްކުރުމަށް މިޞްރުން ވަނީ ގޮވާލާފައެވެ.

ޣައްޒާ ސަރުކާރުގެ މީޑިއާ އޮފީހުން ހާމަކޮށްފައިވާ ގޮތުގައި، އެމެރިކާ މެދުވެރިވެގެން ހަމަޖެއްސި ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުން، އިސްރާއީލުގެ ހަމަލާތަކުގައި މިހާތަނަށް މަދުވެގެން 524 ފަލަސްތީނު ރައްޔިތުން ވަނީ ޝަހީދުކޮށްލާފައެވެ.