ހުޅުމާލެ ދެވަނަ ފިޔަވަހީގެ ހިޔާ ފްލެޓުގެ 5 ވަނަ ޓަވަރުގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު 85 މީހަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވަގުތީ ބޯހިޔާވަހިކަން ފޯރުކޮށްދީފިއެވެ.

އެންޑީއެމްއޭ އިން ބުނީ ހިޔާ ފަސްވަނަ ޓަވަރުގައި ހިނގި އަލިފާނުގެ ހާދިސާގައި ގެއްލުންވީ 38 އެޕާޓްމަންޓެއްގެ ނަރުދަމާ ހޮޅިއަށް ކަމަށާއި އެކަން ރަނގަޅު ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މަސައްކަތް ކުރަމުންދާ ކަމަށެވެ.

ހުކުރު ދުވަހުގެ ރޭ ހުޅުމާލޭ ހިޔާ ޓަވަރުގެ 5 ވަނަ ޓަވަރުގައި ހިނގި އަލިފާނުގެ ހާދިސާއާ ގުޅިގެން މިހާތަނަށް އެހީތެރިކަން ބޭނުންވެގެން ރިޕޯޓުކޮށްފައިވާ 18 އެޕާޓްމަންޓުގައި ދިރިއުޅޭ 85 ފަރާތަކަށް ވަގުތީ ބޯހިޔާވަހިކަން ހަމަޖެއްސުމަށާއި ކެއުން ބުއިމަށް އެހީ ފޯރުކޮށްދީފައިވެއެވެ

ހިޔާގެ ފަސްވަނަ ޓަވަރުގެ ވައިގޮޅީގައި ހުރި އައުޓްޑޯ އޭސީ ޔުނިޓެއްގައި ރޯވެގެން މި ހާދިސާ ހިނގާފައިވަނީ ރޭ އިރުއޮއްސުނު ވަގުތެވެ. އެ ހާދިސާއާ ގުޅިގެން އެ ޓަވަރު އެއްކޮށް ހުސްކުރިއިރު، ރޭގެ 8 ޖަހާކަށްހާއިރު އަލިފާންގަނޑު ވަނީ ނިއްވާލާފަ އެވެ.

އެ ހާދިސާ ހިނގީ، އެ ޓަވަރުގެ ނުވަ ވަނަ ފަންގިފިލާއާއި 14 ވަނަ ފަންގިފިލައާ ދެމެދުގެ ވައިގޮޅީގައި ހުރި އޭސީ އައުޓްޑޯއެއްގައި ކަމަށް އެމްއެންޑީއެފުން ބުންޏެވެ. އެހެންވެ، އެ ޓަވަރުގައި ހުންނަ ވައި ގޮޅީގައި ހުރި ފެން ހޮޅިތަކަށް ބޮޑެތި ގެއްލުންތަކެއް ލިބިފައިވާ ކަމަށް އެމްއެންޑީއެފުން ވަނީ ބުނެފައެވެ.