ލޭންޑް ޔޫސް ޕްލޭނަށް ބަދަލު ގެނެސްފައިވާތީ، ގިރާވަޅު ފަޅުން ގޯތި ލިބުނު މީހުންގެ ގުރު ނެގުން މިއަދު ފަށައިފިއެވެ.

ކުރިން ހަދާފައިވާ، ގިރާވަރުފަޅުގެ ލޭންޑް ޔޫސް ޕްލޭންގައިވާ ގޮތުން އެ ތަނުން ދޫކުރަން ނިންމި 610 ގޯތި މަދުވާތީ އާ ލޭންޑް ޔޫސް ޕްލޭނެއް ހައުސިން މިނިސްޓްރީން ވަނީ ތައްޔާރު ކޮށްފަ އެވެ. އާ ޕްލޭނާ އެކު އެފަޅުން 4،072 ގޯތި ދޫކުރާނެ އެވެ.

ގުރުއަތުލުމުގެ ކަންކަން ކުރިއަށްދާނީ އެންމެންގެ ކުރިމަތީގައި އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވުޒާރާގެ މުވައްޒަފުންގެ ބެލުމުގެ ދަށުންނެވެ. އެ ވުޒާރާއިން ބުނީ، ގުރުއަތުލާ ހޯލަށް ވަދެވޭނީ ބިން ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް އެއް ފަރާތަށް ކަމަށެވެ.

ގިރާވަރުފަޅުން 264.3 ހެކްޓަރުގެ ބިން ހިއްކަން ނިންމާފައިވާއިރު، މި ސަރުކާރުން ވަނީ ތަނުގެ ލޭންޑް ޔޫސް ޕްލޭން ބަދަލުކޮށް، އިތުރަށް ހިއްކަން ނިންމައިފަ އެވެ.

ގުރުއަތުލުން ކުރިއަށްދާއިރު، ކޮންމެ ފަރާތަކަށްވެސް ލިބޭ ޕްލޮޓްގެ މަޢުލޫމާތު 'ހިޔާވެހި ޕޯޓަލް' މެދުވެރިކޮށް ވަގުތުން ފެންނަން ހުންނާނެއެވެ. އަދި އެ ފަރާތަކަށް ލިބޭ ޕްލޮޓް ނަންބަރު އެސް.އެމް.އެސްގެ ޒަރިއްޔާއިންވެސް އަންގަމުންދާނެއެވެ.

ގިރާވަރުފަޅުން ހިއްކަންޖެހޭ ޖުމުލަ 167.15 ހެކްޓަރުގެ ތެރެއިން ބާކީ ނުހިއްކާ އޮތް 97.15 ހެކްޓަރުގެ ބިން ހިއްކުމުގެ މަސައްކަތް އެމްއޭސީއެލުން މިހާރު ވަނީ ފަށައިފަ އެވެ. 

އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ބުނީ، ގުރުއަތުލުން ނިމުމުން ގޯތި ހަވާލުކުރުމާއި، އެއްބަސްވުމުގައި ސޮއިކުރުމާއި ރަޖިސްޓަރީގެ މަސައްކަތް ކުރިއަށްދާނެ ގޮތް ފަހުގެ ތާރީޚެއްގައި އިޢުލާން ކުރާނެ ކަމަށެވެ.