ސަސްޓެއިނަބަލް ޓައުންޝިޕަކީ ރިއަލް އެސްޓޭޓް ސިނާޢަތް އިތުރަށް ފުޅާވުމަށް އެޅޭ ހަރުދަނާ ފިޔަވަޅެއް ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މުޙައްމަދު ސަޢީދު ވިދާޅުވެއްޖެއެވެ.

ސްޕެޝަލް އިކޮނޮމިކް ޒޯންސް (އެސް.އީ.ޒެޑް) ގެ ޤާނޫނީ އޮނިގަނޑުގެ ދަށުން ހުއްދަ ދީފައިވާ އެންމެ ފުރަތަމަ "ސަސްޓެއިނަބަލް ޓައުންޝިޕް"  ޕްރޮޖެކްޓް އައިލާގެ ބިންގާ އެޅުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ މި މަޝްރޫޢަކީ ރައީސް ޑރ. މުޢިއްޒުގެ "ވިޝަން 2040" ގެ ދަށުން ރާއްޖޭގެ އިޤްތިޞާދު ސިންދަފާތުކުރުމަށް އެޅިގެންދާ މުހިންމު ފިޔަވަޅެއް ކަމަށެވެ.

އަދި ޕްރޮޖްކެޓް އައިލާއަކީ ސަރުކާރުގެ ރެޒިޑަންސީ އިންވެސްޓްމަންޓް ޕްރޮގްރާމާއިވެސް ގުޅިފައިވާ މަޝްރޫޢެއް ކަމަށްވެސް މިނިސްޓަރ ވިދާޅުވިއެވެ.

 މިގޮތުން މިނިސްޓަރ ވަނީ މުއްސަނދިންނަށް ރާއްޖެއަކީ އިންވެސްޓްކުރުމުގެ މުޤާބިލުގައި ދިގު މުއްދަތަކަށް އައިސް ހުރެލުމަށްވެސް އެންމެ އެކަށޭނަ މަންޒިލެއްގެ ގޮތުގައި ފައިތިލަ ސާބިތުކުރުމަށް ހުޅިވެގެންދާ ދޮރެއްގެ ގޮތުގައި އައިލާ ޕްރޮޖެކްޓް ސިފަކުރައްވައިފައެވެ.

އަދި މިނިސްޓަރ ވިދާޅުވީ މިއީ ރިއަލް އެސްޓޭޓް ސިނާޢަތް އިތުރަށް ފުޅާވުމަށްވެސް އެޅޭ ހަރުދަނާ ފިޔަވަޅެއް ކަމަށެވެ.

ޖުމްލަ އިންވެސްޓްމަންޓުގެ އަގު 790 މިލިއަން ޑޮލަރަށްވުރެ ބޮޑު މި މަޝްރޫޢަކީ، ރާއްޖޭގައި ޒަމާންވީ ފަތުރުވެރިކަމުގެ މޮޑެލްއިން ޑައިވަރސިފައިޑް ގޮތެއްގައި އަމިއްލަ ފަރާތަކުން ކުރާ އެންމެ ބޮޑު އިންވެސްޓްމަންޓެވެ.

މި މަޝްރޫޢަކީ ލަގްޒަރީ ފަތުރުވެރިކަމާއި، ރެޒިޑެންޝަލް ޑިވެލޮޕްމަންޓުގެ އިތުރުން ދުނިޔޭގެ ފެންވަރުގެ ޞިއްޙީ ޚިދުމަތާއި، ފަތުރުވެރިކަމާބެހޭ ތަޢުލީމާއި، ޒަމާނީ ދަނޑުވެރިކަމުގެ ކޮމްޕޯނަންޓްސް ހިމެނޭގޮތަށް ތަރައްޤީކުރެވިގެންދާނެ މަޝްރޫޢެކެވެ.

މި މަޝްރޫޢުގެ އެންމެ މައިގަނޑު އެއް ސިފައަކީ، މުޅި ޓައުންޝިޕަށް ބޭނުންވާ ހަކަތައިގެ އެންމެ ދަށްވެގެން 60 އިންސައްތަ އިއާދަކުރަނިވި ވަސީލަތްތައް ބޭނުންކޮށްގެން އުފެއްދުމެވެ.

ތިމާވެށްޓަށް ކުރާ ނޭދެވޭ އަސަރު ކުޑަކުރުމަށްޓަކައި ޒަމާނީ ކުނި މެނޭޖްކުރުމުގެ ނިޒާމުތަކާއި ފެނުގެ ނިޒާމުތައް ޓައުންޝިޕްގައި ޤާއިމުކުރެވޭނެއެވެ. މީގެ އިތުރުން މި މަޝްރޫޢުގެ ސަބަބުން ގިނަ ވަޒީފާގެ ފުރުޞަތުތައް އުފެދި، ރާއްޖޭގެ ހުނަރުވެރި މަސައްކަތްތެރިން ބިނާކުރުމަށްވެސް މަގުފަހިވެގެންދާނެއެވެ.

ނ. އަތޮޅުގެ ދެކެނަންފަރާއި ދިގުފަރުގެ އިތުރުން ކުރަމާދޫ ހިމެނޭ ގޮތަށް ޒޯން ކަނޑައަޅާފައިވާ މި މަޝްރޫޢުގެ ބައެއް ނިމި ފަތުރުވެރިންނަށް ހުޅުވިގެންދާނެ ކަމަށް ބެލެވެނީ 2028 ވަނަ އަހަރުގެ ތެރޭގައެވެ.