ރައީސުލްޖުމްހޫރިއްޔާ ޑރ. ޟުހައްމަދު މުޢިއްޒުގެ ދުރުވިސްނޭ ލީޑަޝިޕަށާއި ތަޞައްވުރަށް ނުހަނު ބޮޑަށް ތައުރީފު ކުރައްވާ 'އައިލާ ސަސްޓެއިނަބަލް ޓައުންޝިޕް' އިން ދައްކުވައިދެނީ އެމަނިކުފާނުގެ ވަރުގަދަ ލީޑަރޝިޕް ކަމަށް އެ މަޝްރޫއު ހިންގާ ކްރިސްޓަލް ހޯލްޑިންގްސް ޕްރައިވެޓް ލިމިޓެޑްގެ ސީއީއޯ ޕެޓަރް ކްރިސްޓިކް ވިދާޅުވެއްޖެއެވެ.

ރާއްޖޭގައި ގާއިމްކުރާ އިގްތިސޯދީ ހާއްސަ ސަރަހައްދު ނުވަތަ ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ތަރައްގީ ކުރާ ފުރަތަމަ ޓައުންޝިޕް މަޝްރޫއު، 'އައިލާ ސަސްޓެއިނަބަލް ޓައުންޝިޕް' މަޝްރޫއު މަސައްކަތް ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަ ދައްކަމުން ޕީޓަރ ވިދާޅުވީ އެ ޓައުންޝިފަކީ ރައީސް ޑރ. މުއިއްޒުގެ ހުވަފެންފުޅެއް ކަމަށާއި އެ ހުވަފެންފުޅު ހަގީގަތަށް ވުމުގެ މަސައްކަތް ފެށިފައިވާ ކަމަށެވެ.

ޕީޓަރ ވިދާޅުވި ގޮތުގައި މި މަޝްރޫޢަކީ ރައީސް ޑރ. މުއިއްޒުގެ އިސްނެންގެވުމުގެ ދަށުން ކުރަމުންދާ މަސައްކަތެކެވެ. އަދި ރާއްޖައަކީ ވިޔަފާރިއާއި އިގްތިސާދީ ގޮތުން އިންވެސްޓް ކުރަން ވަރަށް ރަނގަޅު ގައުމެއް ކަމަށް އޭނާ ވިދާޅުވިއެވެ.

"މި މަޝްރޫއުން ދައްކުވައި ދެނީ ރައީސް ޑރ. މުއިއްްޒުގެ ވަރުގަދަ ލީޑާޝިޕް އަދި ރާއްޖެ ތަރައްގީ ކުރެއްވުމަށް އެމަނިކުފާނު ދެއްވާ އަހައްމިއްޔަތުކަން. ރައީސް މުއިއްޒުގެ އެހީތެރިކަމާއި އެއްބާރުލުމަށް ވަރަށް ބޮޑަށް ޝުކުރު އަދާކުރަން." ޕީޓަރ ވިދާޅުވިއެވެ.

މީގެ އިތުރުން އެކި އިދާރާތަކުގެ ޒިންމާދާރުކަމާ ހާމަކަމާއި ސަރުކާރުގެ ދުރުވިސްނުމުގެ ސަބަބުން ރާއްޖޭގައި ރަނގަޅު އިންވެސްޓްމެންޓެއް ކުރުމަށް މަޖްބޫރުވެގެންދާ ކަމަށް ޕީޓަރ ވިދާޅުވިއެވެ.

ޕީޓަރ ޓައުންޝިޕްގެ މަޝްރޫއާއެކު ރާއްޖެއަށް އެކި ދާއިރާތަކުން އިންވެސްޓްމެންޓްތައް ލިބުން ގިނަވަގެންދާނެ ކަމަށާއި އަމާޒަކީ ހަމައެކަނި ލޭންޑް މާކް ޑެސްޓިނޭޝަނެއް ތަރައްގީކުރުމުގެ ބަދަލުގައި ރާއްޖޭގެ ރައްޔިތުންނާއި އިގްތިސާދަށް ފައިދާވާނެ މަޝްރޫއެއް ހިންގުން ކަމަށެވެ.

މި ޓައުންޝިޕްގެ ޚާއްޞަ ސިފަތަކުގެ ތެރޭގައި، އެތަނަށް ބޭނުންވާ ކަރަންޓުގެ 60 އިންސައްތަ އިޔާދަކުރަނިވި ހަކަތައިން އުފެއްދުން ހިމެނެއެވެ. މީގެ އިތުރުން، ދުނިޔޭގެ ފެންވަރުގެ ޞިއްޙީ ޚިދުމަތްދޭ މަރުކަޒަކާއި، ބައިނަލްއަޤްވާމީ ފެންވަރުގެ ޓޫރިޒަމް ސްކޫލެއް މި ސަރަހައްދުގައި ޤާއިމުކުރެވޭނެއެވެ.

ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މި މަޝްރޫޢަކީ ޖުމްލަ 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާގެ އިންވެސްޓްމެންޓެކެވެ. މި މަޝްރޫޢަށް ބޭނުންވާ ބިން ހިއްކުމުގެ މަސައްކަތް މިދިޔަ އަހަރުގެ މާރިޗު މަހު ފަށައި، ޑިސެންބަރު މަހުގެ ނިޔަލަށް ވަނީ ނިންމާލާފައެވެ.