ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، "ޕްރޮޖެކްޓް އައިލާ" ގެ ބިންގާ އަޅުއްވައިދެއްވައި، މި ސަރުކާރުގެ އިސްނެންގެވުމުގެ ދަށުން ރާއްޖޭގައި ފުރަތަމަ ފަހަރަށް ތަރައްޤީކުރާ ދެމެހެއްޓެނިވި ޓައުންޝިޕްގެ އަމަލީ މަސައްކަތް ރަސްމީކޮށް ފައްޓަވައިދެއްވައިފިއެވެ.

ނޫނު އަތޮޅުގެ ދިގުފަރު، ދެކެނަންފަރު އަދި ކުރަމާދޫ ފަޅު ހިމެނޭހެން ކުރިއަށްގެންދާ 790 މިލިއަން އެމެރިކާ ޑޮލަރުގެ މި ބޮޑު މަޝްރޫއަކީ، ކްރިސްޓަލް ހޯލްޑިންގްސް ޕްރައިވެޓް ލިމިޓެޑާއި ބޯޑް އޮފް އިންވެސްޓްމަންޓާ ދެމެދު ވެވުނު އިންވެސްޓްމަންޓް އެއްބަސްވުމެއްގެ ދަށުން، 31 ޑިސެމްބަރު 2025 ގައި ރިޔާސީ ޤަރާރަކުން "ޚާއްޞަ އިޤްތިޞާދީ ސަރަޙައްދު" (އެސް.އީ.ޒެޑް) އެއްގެ ގޮތުގައި ކަނޑައަޅާފައިވާ މަޝްރޫއެކެވެ.

މި ރަސްމިއްޔާތުގައި ވާހަކަދައްކަވަމުން ޕްރޮޖެކްޓް އައިލާގެ ސީ.އީ.އޯ ޕީޓާ ކްރިސްޓިކް ވަނީ، ރައީސް ޑރ. މުޢިއްޒުގެ ދުރުވިސްނޭ ލީޑަޝިޕަށާއި ތަޞައްވުރަށް ނުހަނު ބޮޑަށް ތައުރީފު ކުރައްވާފައެވެ.

އޭނާ ފާހަގަކުރެއްވި ގޮތުގައި، ދެމެހެއްޓެނިވި ޓައުންޝިޕެއް ތަރައްޤީކުރުމުގެ މި މަފްހޫމަކީ ރާއްޖޭގެ ތަރައްޤީގެ މޮޑެލްއަށް އައި ވިސްނުންތެރި އަދި ހަރުދަނާ ބަދަލެކެވެ. އަދި އިންވެސްޓަރުންގެ އިތުބާރު ބޮޑުވެގެން ދިޔައީ ސަރުކާރުގެ ހާމަކަން ބޮޑު ހުއްދަ ދިނުމުގެ ނިޒާމާއި، ވިޔަފާރިތަކަށް ފަހި އިންވެސްޓްމަންޓް މާޙައުލެއް ޤާއިމުކޮށްދީފައި އޮތުމުންކަން އޭނާ ފާހަގަކުރެއްވިއެވެ.

މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސައީދު ދެއްކެވި ވާހަކަފުޅުގައި، ރާއްޖޭގެ އިޤްތިޞާދު ސިންދަފާތުކުރުމަށްޓަކައި ބޮޑެތި އަދި ލާމެހިފައިވާ މަޝްރޫއުތައް ހިންގުމަށް އެސް.އީ.ޒެޑްގެ އޮނިގަނޑު މުހިންމު ދައުރެއް އަދާކުރާކަން ފާހަގަކުރެއްވިއެވެ.

އައިލާ ފަދަ މަޝްރޫއުތަކުގެ ސަބަބުން، ރާއްޖެއަކީ ހަމައެކަނި ޗުއްޓީ ހޭދަކުރާ މަންޒިލެއްގެ ބަދަލުގައި، ދިރިއުޅުމަށާއި، އިންވެސްޓް ކުރުމަށާއި، ދިގުމުއްދަތުގެ މަންފާ ހޯދޭނެ ތަނެއްގެ ގޮތުގައި ބަދަލުވެގެންދާނެ ކަމަށް މިނިސްޓަރު ވިދާޅުވިއެވެ.

ދެހާސް އަށާވީސް ވަނަ އަހަރަށް ނިންމުމަށް އަމާޒުކޮށްފައިވާ މި މަޝްރޫޢުގެ ދަށުން، އެންމެ މަތީ ފަންތީގެ މެރީނާއަކާއެކު ތަރައްޤީކުރާ ރިސޯޓެއްގެ އިތުރުން، ލަގްޒަރީ ދިރިއުޅޭ ތަންތަން ބިނާކުރުމަށް ވަނީ ހަމަޖެހިފައެވެ.

މީގެ އިތުރުން، ބައިނަލްއަޤުވާމީ ފެންވަރުގެ ސިއްހީ ޚިދުމަތްދޭ މަރުކަޒަކާއި، ހޮސްޕިޓަލިޓީ އަދި ލީޑަރޝިޕްގެ ދާއިރާއިން ދުނިޔޭގެ ފެންވަރުގެ ތަޢުލީމު ފޯރުކޮށްދޭ ސްކޫލެއް މި މަޝްރޫޢުގެ ތެރޭގައި ޤާއިމުކުރެވޭނެއެވެ.

މި މަޝްރޫޢު ހިންގުމުގައި ބޭނުންކުރާ ހަކަތައިގެ މަދުވެގެން 60 އިންސައްތައަކީ އިއާދަކުރަނިވި ހަކަތައަށް ވާއިރު، މީގައި ދެމެހެއްޓެނިވި ގޮތެއްގައި މަސްވެރިކަމާއި ދަނޑުވެރިކަން ކުރެވޭނެ ފަދަ ޒަމާނީ ނިޒާމުތައްވެސް އެކުލެވިގެންވެއެވެ.

މި މަޝްރޫޢުގެ ބިންގާ އަޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި ރަސްމިއްޔާތުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރާއި، އިމާރާތްކުރުމާއި ބިނާރާ ބެހޭ ވަޒީރުގެ އިތުރުން 'ޕްރޮޖެކްޓް އައިލާ'، 'ކްރިސްޓަލް ހޯލްޑިންގްސް' އަދި 'ބްލޫ ރޮކް' ގެ މަންދޫބުން ބައިވެރިވެވަޑައިގެންނެވިއެވެ.

ރަސްމިއްޔާތަށްފަހު، ރައީސުލްޖުމްހޫރިއްޔާ ވަނީ މަޝްރޫޢު ކުރިއަށްދާ ސަރަޙައްދަށް ޒިޔާރަތްކުރައްވައި، އެ ތަން ބައްލަވާލައްވާފައެވެ.