ރާއްޖޭގެ ކަނޑުގެ އަޑިން ތެލާއި މިނެރަލް ހޯދުމުގެ މަސައްކަތުން، އިޤުތިޞާދު ކުރިއަރުވަން ފުރުސަތު ތަކެއް ހުޅުވޭނެ ކަމަށް މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު، އަޙްމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ ރާއްޖޭގެ ކަނޑުގެ އަޑިން ތެލާއި މިނެރަލް ހޯދުމުގެ މަސައްކަތް ކުރުމަކީ ތިމާވެއްޓަށް ގެއްލުން ވާނެ ބޮޑު ގޯހެއް ކަމަށް އެމްޑީޕީ ސަރުކާރުގެ ތިމާވެއްޓާބެހޭ ވަޒީރު އައިމިނަތު ޝައުނާ ވިދާޅުވި ވާހަކައަށް ރައްދުދެއްވައެވެ.

ސްޕެޝަލް އިކޮނޮމިކް ޒޯން(އެސްއީޒެޑް)ގައި ކުރެވޭ މަސައްކަތުގެ ތެރޭގައި ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ހިމަނުއްވައިފަ ރައީސް ޑރ. މުހައްމަދު މުއިއްޒު ނެރުއްވި ގަރާރާއި ގުޅިގެން ޝައުނާ ވިދާޅުވީ ރާއްޖޭގެ ކަނޑު މައިންކޮށްގެން ތެލާއި މިނަރަލް ހޯދޭ ގޮތަށް ގާނޫނު ބަދަލުކުރުމަކީ ވަރަށް ބޮޑު ކަންބޮޑުވުމެއް ކަމަށެވެ. އެއީ ކުރު ރާސްތާގެ ފައިދާއަކަށް ވިސްނައި، ހަދާ ވަރަށް ބޮޑު ގޯހެއް ކަމަށެވެ.

ޝައުނާ ފާޅު ކުރެއްވި ޚިޔާލަށް ރައްދު ދެއްވައި ޝިޔާމް ވިދާޅުވީ ދިވެހިރާއްޖޭގެ އިޤްތިޞާދު ފަތުރުވެރިކަމާއި މަސްވެރިކަމުގެ ބޭރުން ސިންދަފާތުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ އިސްތިރާޖީ ޕްލޭނަކީ، ދުރު ރާސްތާގެ ވިލުންވެރިކަން އިތުރުކުރުމަށްޓަކައި އެޅުއްވި ދުރުވިސްނޭ، އަމަލީ ފިޔަވަޅެއް ކަމަށެވެ.

ޝިޔާމް ވިދާޅުވި ގޮތުގައި ރާއްޖޭގެ އިޤްތިޞާދަކީ ބޭރުގެ ލޮޅުންތަކުގެ ކުރިމަތީގައި ނާޒުކު އިޤްތިޞާދަކަށް ވީހިނދު، އިޤްތިޞާދީ ބިންގާ ފުޅާކުރުމުން މިފަދަ ނުރައްކާތައް ކުޑަވެ، ދެމެހެއްޓެނިވި ކުރިއެރުމަށް ހަރުދަނާ ބިންގަލެއް އެޅިގެންދާނެއެވެ.

ދުނިޔޭގެ އެންމެ ބޮޑު ޚާއްޞަ އިޤްތިޞާދީ ސަރަޙައްދުތަކުގެ ތެރޭގައި ހިމެނޭ ގާތްގަނޑަކަށް 900،000 އަކަ ކިލޯމީޓަރުގެ ސަރަޙައްދެއް ރާއްޖެއަށް ލިބިފައިވީ ނަމަވެސް، މިހާތަނަށް އޭގެ ބޭނުން ހިފިފައިވަނީ ވަރަށް ކުޑަ މިންވަރަކަށާއި އެއީ މައިގަނޑު ގޮތެއްގައި ކަނޑުމަހުގެ މަސްވެރިކަމުން ކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ ކަނޑުގެ މި ބޮޑު ވަސީލަތްތައް ރައްކާތެރިކަމާއެކު ދިރާސާކޮށް ތަރައްޤީކުރުމަކީ، ގައުމީ މަސްލަހަތު އިސްކުރާ، އިތުބާރުހުރި އަދި ގާބިލު އިންވެސްޓަރުންނާ ގުޅިގެން ދެމެހެއްޓެނިވި ގޮތެއްގައި މި ވަސީލަތްތަކުގެ ބޭނުން ހިފުމަށް ހުޅުވިގެންދާ އާ ދޮރެއް ކަމަށެވެ.

މޫސުމީ ބަދަލުތަކުގެ ނުރައްކާ އެންމެ ބޮޑަށް އޮތް އެއް ގައުމަށް ވުމާއެކު، އަލަށް ފަށާ ކޮންމެ ހަރަކާތެއްގައިވެސް އެންމެ އިސްކަމެއް ދޭނީ ރައްކާތެރިކަމަށް ކަމަށާއި ކޮންމެ ދިރާސާއަކާއި ތަރައްޤީގެ މަޝްރޫޢެއް ކުރިއަށް ގެންދާނީ ދެފުށް ފެންނަ، ހަރުދަނާ ތިމާވެށީގެ އަސަރު ވަޒަންކުރާ ދިރާސާތަކެއް (EIA) ހެދުމަށްފަހު، ތިމާވެށީގެ ދިރުންތަކަށާއި ދެމެހެއްޓެނިވިކަމަށް އެއްވެސް އުނިކަމެއް ނާންނާނެ ގޮތަށް ޝިޔާމް ވިދާޅުވިއެވެ.

ޝިޔާމް ވިދާޅުވި ގޮތުގައި އިޤްތިޞާދީ ގޮތުން ބަލާއިރު، މި ސިންދަފާތުކުރުމުގެ ސަބަބުން އާ އީޖާދުތަކަށް މަގުފަހިވެ، "ނޫ އިޤްތިޞާދު" ގެ ފުރުޞަތުތަކުގެ މަރުކަޒަކަށް ރާއްޖެ ވެގެންދާނެއެވެ. މީގެ ސަބަބުން މެރިން ޖިއޮލޮޖީ، ސަބްސީ އިންޖިނިއަރިންގ، އެންވަޔަރަންމަންޓަލް ސައިންސް އަދި މޮނިޓަރިންގ ފަދަ ޚާއްޞަ ދާއިރާތަކުން ފަންނީ އަދި މަތީ ފެންވަރުގެ ވަޒީފާގެ ފުރުޞަތުތައް އުފެދި، ދިވެހިންގެ ގާބިލުކަމާއި ތަޖުރިބާ އިތުރުވެގެންދާނެ ކަމަށް ވިދާޅުވިއެވެ