އީރާނުގެ އިގްތިސާދީ ހާލަތާ ގުޅިގެން ރައްޔިތުން ކުރަމުންދާ މުޒާހަރާތައް ކޮންޓްރޯލް ކުރުމަށް ސަރުކާރުން ވަރުގަދަ ފިޔަވަޅުތަކެއް އަޅަމުންދަނިކޮށް، ސަލާމަތީ ބާރުތަކަށް ނިސްބަތްވާ އެތައް ބަޔަކު މަރުވެފައިވާ ކަމަށް އެގައުމުގެ ދައުލަތުގެ މީޑިއާއިން ވަނީ ރިޕޯޓްކޮށްފައެވެ.

މީގެ އިތުރުން، އެމެރިކާއިން އީރާނަށް އަސްކަރީ ހަމަލާއެއް ދީފިނަމަ، އެމެރިކާއަށާއި އިސްރާއީލަށް ވަރުގަދަ ރައްދެއް ދޭނެ ކަމުގެ އިންޒާރު އީރާނުގެ މަޖިލީހުގެ ރައީސް ވަނީ ދެއްވާފައެވެ.

ދައުލަތުގެ ޓީވީން އާދީއްތަ ދުވަހު ބުނި ގޮތުގައި، ފަހަކަށް އައިސް ހިނގި ހަމަނުޖެހުންތަކުގައި އިސްފަހާން ޕްރޮވިންސުން ފުލުހުންނާއި ސަލާމަތީ ބާރުތަކުގެ 30 މީހަކު އަދި ހުޅަނގު އީރާނުގެ ކަރުމަންޝާ އިން 6 މީހަކު ވަނީ މަރުވެފައެވެ. އަދި ތަސްނީމް ނިއުސް އެޖެންސީން ރިޕޯޓްކޮށްފައިވާ ގޮތުގައި، މުޅި ގައުމުގައި ހިނގި މުޒާހަރާތަކުގައި މިހާތަނަށް ސަލާމަތީ ބާރުތަކުގެ ޖުމްލަ 109 މީހަކު ވަނީ މަރުވެފައެވެ.

އީރާނުގެ ރެޑް ކްރެސެންޓް ސޮސައިޓީން ބުނި ގޮތުގައި، ގޯލެސްތާން ޕްރޮވިންސުގެ ވެރިރަށް ގޯރްގާންގައި ހުންނަ އެ ޖަމްއިއްޔާގެ އިމާރާތަކަށް ދިން ހަމަލާއެއްގައި އެތަނުގެ މުވައްޒަފަކު ވަނީ މަރުވެފައެވެ. މީގެ އިތުރުން، ހޮނިހިރު ދުވަހުގެ ރޭ އިރުމަތީ އީރާނުގެ މަޝްހަދުގައި ހުންނަ މިސްކިތެއްގައި ރޯކޮށްލާފައިވާ ކަމަށްވެސް ދައުލަތުގެ މީޑިއާއިން ބުނެއެވެ.

އީރާނުގެ ދާޚިލީ ވުޒާރާއިން ބުނާ ގޮތުގައި، ގައުމުގެ މަސްލަހަތު ގެއްލޭ ގޮތަށް ހިންގާ "ހަމަނުޖެހުންތައް" މިހާރު ދަނީ މަޑުމަޑުން މައިތިރިވަމުންނެވެ. ނަމަވެސް، މި ހަމަނުޖެހުންތަކުގައި އިސްކޮށް އުޅޭ ފަރާތްތަކަށް މަރުގެ އަދަބު ދެވިދާނެ ކަމުގެ އިންޒާރު އެގައުމުގެ އެޓާނީ ޖެނެރަލް ވަނީ ދެއްވާފައެވެ.

ސަލާމަތީ ކަންކަމާ ބެހޭ އިސް އޮފިޝަލެއް ކަމަށްވާ އަލީ ލާރިޖާނީ ވަނީ، މުޒާހަރާގެ ބައެއް ބައިވެރިން މީހުން މެރުމާއި ތަންތަނުގައި ހުޅުޖެހުން ފަދަ އަމަލުތައް ހިންގަމުންދަނީ އައި.އެސް ޖަމާއަތުން އަމަލުކުރާ ފަދަ ރަހުމުކުޑަ ގޮތަކަށް ކަމަށް ތުހުމަތުކުރައްވާފައެވެ.

އީރާނުގެ ސަރުކާރުން މުޒާހަރާގެ ބައިވެރިން މަރާނަމަ، އެގައުމަށް އަސްކަރީ ހަމަލާދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވާފައިވާތީ، މަޖިލީހުގެ ރައީސް މުޙައްމަދު ބާގިރު ގާލިބާފް ވަނީ އެމެރިކާއިން "ނުބައި ހިސާބެއް" ނުޖެހުމަށް ގޮވާލައްވައި އިންޒާރު ދެއްވާފައެވެ.