އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް، އެމެރިކާ ސިފައިން ހިންގި ނުރައްކާތެރި އަސްކަރީ އޮޕަރޭޝަނެއްގައި ވެނެޒުއޭލާގެ ކުރީގެ ރައީސް ނިކޮލަސް މާދޫރޯ ހައްޔަރުކޮށްގެން ގެންދިޔަތާ ހަފުތާތަކެއް ފަހުން، އެޤައުމުގެ ސިފައިންނާއި ފުލުހުން ވަގުތީ ރައީސް ޑެލްސީ ރޮޑްރިގޭޒަށް ވަފާތެރިވުމަށް ބައީޢަތް ހިފައިފިއެވެ.

ކަރަކަސްގައި ހުންނަ ފުއާޓޭ ޓިއުނާ މިލިޓަރީ ކޮމްޕްލެކްސްގެ "މިލިޓަރީ އެކަޑަމީ އޮފް ދަ ބޮލިވޭރިއަން އާމީ" ގައި ބުދަ ދުވަހު ބޭއްވި ރަސްމިއްޔާތެއްގައި، އެޤައުމުގެ އަސްކަރިއްޔާގެ އިސްވެރިން ވަނީ ރޮޑްރިގޭޒްގެ ސަރުކާރަށް ފުރިހަމައަށް ތާއީދުކުރާނޭކަން ހާމަކޮށްފައެވެ.

“އަޅުގަނޑުމެން މި ހުވާކުރަނީ ސަރުކާރަށް ފުރިހަމައަށް ކިޔަމަންތެރިވެ، ވަފާތެރިކަންމަތީ ދެމިތިބުމަށް،" މިނިވަންކަމުގެ ބަތަލު ސައިމަން ބޮލީވާގެ ކަނޑިކޮޅާއި ބެޓަން ރޮޑްރިގޭޒާ ޙަވާލުކުރައްވަމުން ޑިފެންސް މިނިސްޓަރު ލަޑިމިއަރް ޕަޑްރީނޯ ވިދާޅުވިއެވެ.

ޕަޑްރީނޯ މިހެން ވިދާޅުވެފައިވަނީ، މާދޫރޯ އާއި އޭނާގެ އަނބިކަނބަލުން ސީލިއާ ފްލޯރެސް އެމެރިކާ ސިފައިން ހައްޔަރުކޮށްގެން ގެންދިޔަ ހާދިސާއަށްފަހުގައެވެ. ޑިފެންސް މިނިސްޓަރު ވިދާޅުވި ގޮތުގައި އެމެރިކާގެ އެ ހަމަލާތަކުގައި 83 މީހުން މަރުވެފައިވެއެވެ. އޭގެ ތެރޭގައި ވެނެޒުއޭލާގެ 47 ސިފައިންނާއި ކިއުބާގެ ސަލާމަތީ ބާރުތަކުގެ 32 މީހުން ހިމެނެއެވެ.

މާދޫރޯގެ ސަރުކާރުގައި ނައިބު ރައީސްގެ މަޤާމުގައި ހުންނެވި ރޮޑްރިގޭޒް ވަނީ ޤައުމަށް "އައު ސިޔާސީ ފެށުމެއް" ގެންނަވާނެ ކަމަށް ވަޢުދުވެވަޑައިގެންފައެވެ. އަދި އޭނާގެ އައު މަސްއޫލިއްޔަތުތަކާ ޙަވާލުވެވަޑައިގަތުމަށްފަހު، އެންމެ ފުރަތަމަ ކުރެއްވި ކަމަކީ މާދޫރޯގެ ވެރިކަމުގައި ޖަލަށްލާފައި ތިބި ސިޔާސީ ކުށްވެރިން މިނިވަންކުރެއްވުމެވެ.

ކަރަކަސްގައި ބޭއްވި އަސްކަރީ ރަސްމިއްޔާތުގައި ރޮޑްރިގޭޒް ދެއްކެވި ވާހަކަފުޅުގައި، އިދިކޮޅު ލީޑަރު މަޗާޑޯއަށް އިޝާރާތްކުރައްވައި ވިދާޅުވީ، "ވެނެޒުއޭލާގެ ރައްޔިތުންނަށް ގެއްލުމާއި ހަލާކު ދިނުމަށް އެދޭ މީހުން، ވޮޝިންޓަނުގައި ތިބުމަށް" ދޫކޮށްލާށެވެ.