އެމެރިކާގެ ރައީސް ޑޮނަލްޑް ޓްރަމްޕް އީރާނަށް ދެއްވަމުން ގެންދަވާ އިންޒާރުތައް އެޤައުމުން ބަލައިނުގަންނަކަން ހާމަކޮށް، އެމެރިކާގެ ކޮންމެ ހަމަލާއަކަށް ވަރުގަދަ ރައްދެއް ދިނުމަށް ތައްޔާރަށް އޮތްކަން އީރާނުން އިޢުލާނުކޮށްފިއެވެ.
އީރާނުގެ ޚާރިޖީ ވަޒީރު ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް އެޤައުމާ ދެކޮޅަށް އަސްކަރީ ފިޔަވަޅު އަޅާނެ ކަމަށް ދެއްވި އިންޒާރު ތަކުރާރު ކުރެއްވުމާ ގުޅިގެން، އެމެރިކާއިން ދީފާނެ ކޮންމެ ހަމަލާއަކަށް "ވަގުތުން އަދި ވަރުގަދަ" ރައްދެއް ދިނުމަށް އީރާނުގެ ހަތިޔާރު އެޅި ފައުޖުތައް ތިބީ ފުރިހަމައަށް ތައްޔާރުވެގެން ކަމަށެވެ.
"އަޅުގަނޑުމެންގެ ކެރޭ ހިތްވަރުގަދަ ސިފައިން ތިބީ ވަރަށް ފާރަވެރިކަމާއެކު، ކޮންމެ ވަގުތެއްގައިވެސް ރައްދު ދޭންޖެހިދާނެ ކަމަށް ތައްޔާރުވެގެން. އަޅުގަނޑުމެންގެ ލޮބުވެތި ވަޒަނުގެ ބިމަށާއި، ވައިގެ ސަރަޙައްދަށް ނުވަތަ ކަނޑުގެ ސަރަޙައްދަށް ދޭ ކޮންމެ އުދުވާނީ ހަމަލާއަކަށް ވަގުތުން ވަރުގަދަ ރައްދެއް ދޭނެ،" އީރާނުގެ ޚާރިޖީ ވަޒީރު އައްބާސް އަރާގްޗީ ބުދަ ދުވަހުގެ ރޭ ސޯޝަލް މީޑިއާގައި ލިޔުއްވާފައިވެއެވެ.
އަރާގްޗީ އިތުރަށް ވިދާޅުވީ، މިދިޔަ އަހަރުގެ ޖޫން މަހު އިސްރާއީލުން އީރާނަށް ދިން ހަމަލާތަކާއި، ޓްރަމްޕްގެ ސަރުކާރުން އީރާނުގެ ނިއުކްލިއާ މަރުކަޒުތަކަށް ދިން ހަމަލާތަކުން ވަރަށް "އަގުހުރި ފިލާވަޅުތަކެއް" ލިބިފައިވާ ކަމަށެވެ. "12 ދުވަހުގެ ހަނގުރާމައިން ލިބުނު ފިލާވަޅުތަކުގެ ސަބަބުން، ކުރިއަށްވުރެ މާ ވަރުގަދަކޮށް، އަވަހަށް އަދި ފުންކޮށް ރައްދު ދިނުމުގެ ގާބިލުކަން އަޅުގަނޑުމެންނަށް ވަނީ ލިބިފައި،" އޭނާ ވިދާޅުވިއެވެ.
އަރާގްޗީ މިހެން ވިދާޅުވެފައިވަނީ، އީރާނުގެ ދާޚިލީ މުޒާހަރާތައް ހުއްޓުވުމަށް އެޤައުމުގެ ސަރުކާރުން ގެންގުޅޭ ހަރުކަށި އުސޫލުތަކާ ގުޅިގެން ވޮޝިންޓަނުން އީރާނަށް ފިއްތުންތައް ކުރިމަތިކުރަމުންދާ ދަނޑިވަޅެއްގައި، ޓްރަމްޕް އަނެއްކާވެސް އަސްކަރީ ހަމަލާއެއް ދީފާނެ ކަމުގެ އިންޒާރު އާކުރެއްވިތާ މަދު ގަޑިއިރުތަކެއްގެ ތެރޭގައެވެ.
އެމެރިކާގެ ރައީސް އިތުރަށް ވިދާޅުވީ، އީރާނުން އަވަހަށް "މަޝްވަރާގެ މޭޒަށް" އައިސް، ނިއުކްލިއާ ހަތިޔާރު ނުހިމެނޭ، ހުރިހާ ފަރާތްތަކަކަށް އިންސާފުވެރި އެއްބަސްވުމަކަށް އަންނާނެ ކަމަށް އުންމީދު ކުރައްވާ ކަމަށެވެ. "ވަގުތު މިދަނީ ފާއިތުވަމުން. މިއީ ވަރަށް މުހިންމު ވަގުތެއް. އަޅުގަނޑު ކުރިންވެސް އީރާނަށް ބުނި ފަދައިން، “އެއްބަސްވުމަކަށް އާދޭ!" ޓްރަމްޕް ވިދާޅުވިއެވެ.
