ފުރަތަމަ ފަހަރަށް މާލެއިން ބޭރުގައި ޤާއިމުކުރި ކެތިޓަރައިޒޭޝަން ލެބޯޓަރީ (ކެތު ލެބް) އައްޑޫ އެކުއެޓޯރިއަލް ހޮސްޕިޓަލްގައި ހުޅުވައި ހިދުމަތް ދޭން ފަށައިފިއެވެ.

އައިޖީއެމްއެޗްގެ ބެލުމުގެ ދަށުން ހިންގާ ގޮތަށް ޤާއިމު ކުރި މި ކެތުގެ ޚިދުމަތް ފަށާފައިވާއިރު އައިޖީއެމްއެޗްގެ ކާޑިއެކްޓް ސެންޓަރުގެ ޑޮކްޓަރުންނާއި ނަރުހުންނާއި ޓެކްނީޝިއަނުންގެ އެހީތެރިކަމާއި އެކުގައި މިހާތަނަށް 7 މީހަކު ވަނީ ފަރުވާ ހޯދާފައެވެ.

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، ކެތު ލެބުގެ ޚިދުމަތް ފެށުމަށްޓަކައި ގިނަ މަސައްކަތްތަކެއް ކޮށްފައިވާ ކަމަށެވެ. އަދި އައްޑޫ ސިޓީގައި ކެތު ލެބުގެ ޚިދުމަތް ފެށިގެންދިޔައީ މުޅިންވެސް ދިވެހިންނާއި އެކުގައި ކަމަށް ވިދާޅުވިއެވެ.

ޙަލީމް ވިދާޅުވީ އެ އައިޖީއެމްއެޗްގެ ކާޑިއެކް ސެންޓަރުގެ ބޭފުޅުން އައްޑޫއަށް ވަޑައިގެން ޕްރޮސީޖާތައް ހަދަމުން ގެންދާނެ ކަމަށެވެ. އަދި އައްޑޫ ހޮސްޕިޓަލްގެ ޓީމްތައް ތަމްރީންކުރުމުގެ މަސައްކަތް ވެސް ކުރިއަށްދާނެ ކަމަށް ވިދާޅުވިއެވެ.

އޭއީއެޗްގެ ތެރަޕިއުޓިކް އެންޑް ޑައިގްނޯސްޓިކްގެ ޑިރެކްޓަރު، ޝާހް ސައީދު ވިދާޅުވީ، ކެތް ލެބެއްގައި ދޭ ފަރުވާއަކީ ހިތުގެ ބައްޔެއް ޖެހިގެން އައުމުން އެންޖީއޯ ގްރާމް ނުވަތަ ހިތުގެ ބައްޔެއް ހުރިތޯ ދެނެގަންނަން ހަދަން ޖެހޭ ޓެސްޓެއް ހެދުން ކަމަށެވެ.

އައްޑޫ އިކުއެޓޯރިއަލް ހޮސްޕިޓަލުގެ ސީއީއޯ އިބްރާހިމް ޔާސިރު ވިދާޅުވީ، އައްޑޫގައި ކެތު ލެބު ޤާއިމްކުރީ 2023 ގައި ކަމަށެވެ. އެހެންނަމަވެސް ޚިދުމަތް ނުފެށި ގިނަ ދުވަސްތަކެއް ވެފައިވާ ކަމަށާއި، މި ސަރުކާރުން ކުރެއްވި މަސައްކަތުން ކެތު ލެބުގެ މަސައްކަތް ފެށުމަކީ، މުޅި ދެކުނުގެ އަތޮޅުތަކަށްވެސް ލިބުނު ކުރިއެރުމެއް ކަމަށެވެ.

އައްޑޫގައި ކެތު ލެބުގެ ޚިދުމަތް ފެށުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ.