ލޯކަލް ކައުންސިލް އިންތިހާބަަށް ކުރިމަތިލާން ފޯމް ހުށަހަޅަން ކޮންމެ ދުވަހު ދޭ ވަގުތު އިލެކްޝަންސް ކޮމިޝަން (އީސީ) އިން އިތުރުކޮށްފި އެވެ.

އިންތިޚާބަށް ވާދަކުރުމަށް ފޯމު ހުށަހަޅަން ޖެހެނީ، އިލެކްޝަންސް ކޮމިޝަންގެ މައި ޕޯޓަލް މެދުވެރިކޮށެވެ. ފޯމު ހުށަހެޅުމުގެ ފުރުޞަތު މި މަހުގެ 17ވަނަ ދުވަހު ހުޅުވާލާފައިވާއިރު، ޕޯޓަލް މެދުވެރިކޮށް ފޯމު ބަލައިގަންނަ ވަގުތު ކަމުގައި ކަނޑައަޅާފައިވަނީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން މެންދުރު 15:30އަށެވެ. އަދި ހުކުރު ދުވަސްތަކުގައި މެންދުރު 15:30 އިން 18:00 އަށެވެ.

އީސީން މިއަދު ބުނީ އޭގެ ބަދަލުގައި މިހާރު ކޮންމެ ދުވަހަކު ވެސް ފޯމް ހުށަހަޅަން ދެގަޑިއިރު އިތުރަށް ލިބޭނެ ކަމަށެވެ. އެގޮތުން ފޯމު ހުށަހެޅުމުގެ ވަގުތަކީ މިހާރު ހުކުރު ދުވަސް ފިޔަވައި އެހެން ދުވަސްތަކުގައި ހެނދުނު 8:30 އިން ހަވީރު 17:30 އަށެވެ. އަދި ހުކުރު ދުވަހު މެންދުރުފަހު 15:30 އިން ރޭގަނޑު 20:00 އަށް ކަމަށް އީސީން ބުންޏެވެ.

އިލެކްޝަންސް ކޮމިޝަނުން މި ބަދަލު ގެންނެވީ، މައި ޕޯޓަލް މެދުވެރިކޮށް ފޯމު ހުށަހަޅަން ހުޅުވާލާ ވަގުތަކީ އެކަށީގެންވާ ވަގުތެއް ނޫންކަމަށް ބައެއް ސިޔާސީ ޕާޓީތަކުންނާއި ސިޔާސީ ފަރާތްތަކުން ބުނެފައިވަނިކޮށެވެ.

އިންތިޚާބުގައި ވާދަކުރަން 10 ދުވަހުގެ ތެރޭގައި 2،254 ފޯމު ވަނީ ހުށަހަޅާފައެވެ. އެއީ، ކައުންސިލްތަކަށް ވާދަކުރުމަށް ހުށަހެޅި 1،276 ފޯމާއި، އަންހެނުންގެ ކޮމިޓީތަކަށް ވާދަކުރުމަށް ހުށަހެޅި 978 ފޯމެވެ. ނަމަވެސް މީގެ ތެރެއިން ފޯމު ބަލައިގަނެ ކެންޑިޑެސީ ޤަބޫލުކޮށްފައިވަނީ 1857 މީހުންނެވެ.