އީރާނުގެ ނިއުކްލިއާ މަޝްރޫޢާ ގުޅޭގޮތުން އައު އެއްބަސްވުމެއް ގާއިމުކުރުމަށް ގޮވާލައްވަމުން، އެމެރިކާއިން އީރާނަށް އަސްކަރީ ހަމަލާއެއް ދިނުމަށް ތައްޔާރަށް އޮތްކަމުގެ އިންޒާރު ރައީސް ޑޮނަލްޑް ޓްރަމްޕ އަލުން ދެއްވައިފިއެވެ.
ބުދަ ދުވަހު "ޓްރުތް ސޯޝަލް" ގައި ކުރެއްވި ދިގު ޕޯސްޓެއްގައި ޓްރަމްޕް ވިދާޅުވީ، ބިޔަ އަސްކަރީ ފައުޖެއް އީރާނާ ދިމާލަށް މިސްރާބު ޖަހާފައިވާ ކަމަށެވެ. އަދި އެ ފައުޖު ދަތުރުކުރަމުންދަނީ ވަރަށް ބާރު މިނުގައި، ވަރުގަދަ އަޒުމަކާއި ބޮޑު ބޭނުމަކާ އެކު ކަމަށް އޭނާ ވިދާޅުވިއެވެ.
އެމެރިކާގެ ރައީސް އިތުރަށް ވިދާޅުވީ، އީރާނުން ވީހާވެސް އަވަހަކަށް މަޝްވަރާގެ މޭޒަށް އައިސް، ހުރިހާ ފަރާތްތަކަށްވެސް ފައިދާހުރި، އިންސާފުވެރި އެއްބަސްވުމެއް ގާއިމުކުރާނެ ކަމަށް އުއްމީދު ކުރައްވާ ކަމަށެވެ. މި އެއްބަސްވުމުގެ މައިގަނޑު މަގްސަދަކީ އީރާނުން ނިއުކްލިއާ ހަތިޔާރު އުފެއްދުން ހުއްޓުވުން ކަމަށް އޭނާ ފާހަގަކުރެއްވިއެވެ. އަދި ވަގުތު ކުޑަތަންވަމުންދާތީ، އަވަހަށް އެއްބަސްވުމަކަށް އައުމަށް އީރާނަށް ވަނީ އިލްތިމާސް ކުރައްވާފައެވެ.
މިދިޔަ ޖޫން މަހު އެމެރިކާއިން އީރާނުގެ ނިއުކްލިއާ ތިން މަރުކަޒަކަށް ދިން ހަމަލާތަކަށް އިޝާރާތް ކުރައްވައި ޓްރަމްޕް އިންޒާރު ދެއްވީ، އެއްބަސްވުމަކަށް ނާދެވިއްޖެނަމަ ދެން ދޭ ހަމަލާ މިއަށްވުރެ މާ ވަރުގަދަވެފައި ނުރައްކާތެރިވާނެ ކަމަށެވެ.
ޓްރަމްޕް މިފަދަ ހަރުކަށި އިންޒާރެއް ދެއްވާފައިވަނީ، ހަމަލާގެ ބިރު އޮތް ހާލަތެއްގައި މަޝްވަރާތައް އަލުން ފަށަން އީރާނުން ބޭނުން ނުވާކަމަށް އެގައުމުގެ ފޮރިން މިނިސްޓަރު އައްބާސް އަރަގްޗީ ވިދާޅުވިތާ ކުޑަވަގުތުކޮޅެއް ފަހުންނެވެ.
އީރާނުގެ އެންމެ އިސް ޑިޕްލޮމެޓް ބާރުއަޅުއްވައި ވިދާޅުވީ، އެގައުމުން މަޝްވަރާ ކުރަން އެދިފައި ނުވާނެ ކަމަށާއި، ބިރުދެއްކުންތަކާއި އިންޒާރުތައް ކުރިއަށްދާހާ ހިނދަކު މަޝްވަރާގެ މޭޒަށް ނުދާނެ ކަމަށެވެ.
އިރާނުގެ އެތެރޭގެ މުޒާހަރާތައް ހުއްޓުވުމަށް އެ ގައުމުގެ ސަރުކާރުން ބާރުގެ ބޭނުންކުރާ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް އިރާނަށް ހަމަލާދީފާނެ ކަމުގެ އިންޒާރު ދެއްވައި، "ޔޫއެސްއެސް އަބްރަހަމް ލިންކަން" މަނަވަރާއެކު އަސްކަރީ ބާރުތައް އެ ސަރަހައްދަށް ވަނީ ފޮނުވާފައެވެ.
މީގެ އިތުރުން، އީރާނުގެ އޮފިޝަލުން ވަނީ އެގައުމަށް އަލުން ހަމަލާއެއް ދީފިނަމަ، ވަރަށް ފުރިހަމަ އަދި ދެވަނަ ފަހަރަށް އެފަދަ ކަމެއް ކުރަން ނުކެރޭނެ ފަދަ "ހިތާމަކުރަންޖެހޭ" ވަރުގަދަ ރައްދު ހަމަލާއެއް ދޭނެ ކަމަށް ވިދާޅުވެފައެވެ.
