ޓެކްނޮލޮޖީގެ ބޮޑު ކުންފުނި ގޫގުލްއަށް އަމިއްލަ އިޝްތިހާރުގެ ޚިދުމަތްތަކަށް އިސްކަންދީ ވާދަވެރިކަމަށް ހުރަސްއެޅިކަމުގެ ތުހުމަތުގައި ޔޫރަޕިއަން ޔޫނިއަން (އީ.ޔޫ.) އިން 2.95 ބިލިއަން ޔޫރޯ (3.45 ބިލިއަން ޑޮލަރު) ގެ ބޮޑު ޖޫރިމަނާއެއް ކޮށްފި އެވެ.

ޔޫރަޕިއަން ކޮމިޝަންއިން ގޫގުލްއަށް ތުހުމަތުކުރަނީ، 27 ގައުމު ހިމެނޭ މި ބްލޮކްގައި ވާދަވެރިކަން ކޮށިކޮށް، އިންސާފުކުޑަ އުސޫލުތައް ބޭނުންކުރާ ކަމަށެވެ. މި ތުހުމަތުތައް އާންމުކޮށްފައިވަނީ ޔޫރަޕިއަން ޕަބްލިޝާރސް ކައުންސިލްއިން ހުށަހެޅި ޝަކުވާއެއް ތަޙްޤީޤުކުރުމަށް ފަހުގައެވެ. އެމެރިކާގެ ރައީސް ޑޮނަލްޑް ޓްރަމްޕްގެ ބަދަލުހިފުމުގެ އިންޒާރުތަކަށް ބެލުމެއްނެތި، ޓެކްނޮލޮޖީގެ މި ބޮޑު ކުންފުނި ކޮންޓްރޯލްކުރުމަށް އީ.ޔޫ. އިން ދަނީ މަސައްކަތްކުރަމުންނެވެ.

ގޫގުލްއަށް މި ޖޫރިމަނާކުރުމާ ގުޅިގެން ޑޮނަލްޑް ޓްރަމްޕް ވަނީ މި ނިންމުމަށް ފާޑުކިޔާފައެވެ. އަދި އީ.ޔޫ. އާ ދެކޮޅަށް ފުޅާދާއިރާއެއްގައި ވިޔަފާރީގެ ތަޙްޤީޤެއް ފެށާނެކަމުގެ އިންޒާރު ދެއްވިއެވެ. ޓްރޫތު ސޯޝަލްގައި ލިޔުއްވަމުން ޓްރަމްޕް ވިދާޅުވީ، "އެމެރިކާގެ މޮޅު އަދި މިސާލެއް ނެތް އީޖާދީ ބާރުތަކަށް މިކަންތައް ވާކަށް އަހަރުމެން ދުކުރާކަށް ނުޖެހޭނެ. މިކަން ވެއްޖެނަމަ، ޓެކްސް ދައްކާ އެމެރިކާގެ މި ކުންފުނިތަކަށް ކުރިމަތިކުރުވާ އިންސާފުކުޑަ އަދަބުތައް ބާތިލުކުރުމަށް ސެކްޝަން 301 ގެ ކަންކަން ފަށަން މަޖުބޫރުވާނެ." ކަމަށެވެ.

އީ.ޔޫ. ގެ ވާދަވެރިކަމާބެހޭ އިސްވެރިޔާ ޓެރެސާ ރިބޭރާ، މިއަދަބު ހޯމަ ދުވަހު އިއުލާނުކުރުމަށް ނިންމަވާފައި އޮތް ނަމަވެސް، އީ.ޔޫ. ގެ ވިޔަފާރި ކަންކަމާބެހޭ އިސްވެރިޔާ މާރޮސް ސެފްކޮވިޗްގެ ދެކޮޅުހެދުމާހެދި އެކަން ފަސްކުރެއްވިއެވެ. އެކަން ފަސްކުރެއްވީ، މިދިޔަ ޖުލައި މަހު އެއްބަސްވި ވިޔަފާރީގެ އެއްބަސްވުމެއްގެ ދަށުން ޔޫރަޕިއަން ކާރުތަކަށް ޓެރިފްތައް ކުޑަކުރުމަށް އެމެރިކާއިން ދީފައިވާ ދައުވަތުތަކަށް މިކަމުގެ ސަބަބުން ނޭދެވޭ އަސަރުތަކެއް ކޮށްފާނެ ކަމުގެ ކަންބޮޑުވުންތަކެއް ހުރުމުންނެވެ.