އެމްޑީޕީގެ ވެރިކަމުގައި އިނދަޖައްސާލާފައި އޮތް ރާއްޖޭގެ މަސްވެރިކަމުގެ ސިނާއަތް އަނބުރާ ކޮޅަށް ޖަހައިދިނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ސަރުކާރުން ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ސުޖާއު ވިދާޅުވެއްޖެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ސުޖާއު ވިދާޅުވީ، ބޮޑު ކަންނެލި މަސްވެރިން ހިމެނޭގޮތަށް، ނިމިދިޔަ އެމްޑީޕީ ސަރުކާރުން ފުނޑާލާފައިވާ މަސްވެރި ސިނާއަތް އަލުން އާރާސްތުކޮށް، ދިވެހި މަސްވެރިންގެ މޫނުމައްޗަށް އުފާވެރިކަން ގެނެސްދެއްވާނެ ވެރިއަކީ ރައީސް ޑރ. މުޢިއްޒު ކަމަށެވެ.

ސުޖާއު އިތުރަށް ފާހަގަކުރެއްވި ގޮތުގައި، އެމްޑީޕީގެ ވެރިކަމުގައި ހީނަރުކޮށްލާފައިވާ އެކި ދާއިރާތަކާއި ސިނާއަތްތައް، މާތްاللهގެ ތަނަވަސް ރަހްމަތާއެކު ރައީސް މުޢިއްޒު ގެންދަވަނީ އަލުން ބިނާކުރައްވަމުންނެވެ. އަދި މި މަސައްކަތުގެ ސަބަބުން ރާއްޖޭގެ އިޤްތިޞާދު ކުރިއަރަމުންދާކަން އޭނާ ފާހަގަކުރެއްވިއެވެ.

މީގެއިތުރުން، މި ސަރުކާރުން ކުރަމުންދާ އިޞްލާޙީ މަސައްކަތްތަކާއެކު، އެންމެ ބޮޑު ކުރިއެރުމެއް ލިބި، އެންމެ ބޮޑު އުފަލެއް ލިބޭނެ އެއް ސިނާއަތަކީ ދިވެހި މަސްވެރި ސިނާއަތް ކަމުގައި ވެގެންދާނެ ކަމަށް ސުޖާއު ވިދާޅުވިއެވެ.

މި ސަރުކާރުގެ އަމާޒަކީ މަސްވެރިންނަށް ލިބެންޖެހޭ އާމްދަނީ އިތުރުކޮށް، މަސްވެރިކަމުގެ ދާއިރާގައި ހުރި ގޮންޖެހުންތަކަށް ދާއިމީ ހައްލެއް ހޯދައިދިނުން ކަމަށްވެސް އޭނާގެ ވާހަކައިގައި ފާހަގަކުރައްވާފައިވެއެވެ.

ބޮޑުކަންނެލީގެ މަސްވެރިންނަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމަށް ސަރުކާރުން ކުރައްވާ މަސައްކަތްތަކުގެ ތެރޭގައި ހިމަނައިގެން ކަނޑުއޮތްގިރި އޮޕަރޭޝަނަށް ގެނެސް ކަންނެލި ގަންނަން މިހާރުވަނީ ފަށައިފައެވެ.

ކަނޑުއޮތްގިރިން ބޮޑު ކަންނެލި ގަންނަން ފަށާފައިވަނީ 15 ކިލޯއަށްވުރެ މަތީގެ ބޮޑުކަންނެއްޔަށް 25 ރުފިޔާގެ ރޭޓުންނެވެ. މީގެ އިތުރުން ކަނޑުއޮތްގިރިއަށް ކަޅުބިލަ މަސްވެސް ވަނީ ގަންނަން ފަށާފައެވެ.

އެ މަސައްކަތް ފާހަގަކޮށް މިފްކޯ އިން ކުދި ކަންނެލި ގަންނަން ފެށުމަކީ ރަނގަޅު ފެށުމެއް ކަމަށް ބޮޑުކަންނެލި މަސްވެރިންގެ ޔޫނިއަން އިން ބުނެފައިވެއެވެ.

ބޮޑުކަންނެލި މަސްވެރިންގެ ޔޫނިއަން އިން މީސް މީޑިއާގައި ކުރި ޕޯސްޓެއްގައި ބުނެފައިވަނީ ކުދި އަދި ރިޖެކްޓް ކަންނެލި މިފްކޯއަށް ގަންނަން ފެށުމަކީ ރަނގަޅު ފެށުމެއް ކަމުގައި ދެކޭ ކަމަށެވެ.

އެ ޔޫނިއަން އިން އިތުރަށް ބުނެފައިވަނީ މަޝްވަރާ ކުރެވުނު އަގު ކުދި އަދި ރިޖެކްޓް ކަންނެއްޔަށްދީ ސަރުކާރުގެ ރިޔާސީ ވަޢުދާއި އެއްގޮތަށް މިފްކޯއަށް ބޮޑުކަންނެލި ވީހާވެސް އަވަހަކަށް ގަންނަން ފެށާނެ ކަމަށް އުންމީ ކުރާ ކަމަށެވެ.