ހާލަންޑާ ނުލައި މެންޗެސްޓަރ ސިޓީއަށް އޮތް ފުރުސަތުތައް އުމަރު މާމޫޝް ޕެޕް ގާޑިއޯލާއަށް ދައްކަލައިފިއެވެ.
މި ސީޒަނުގައި މެންޗެސްޓަރ ސިޓީގެ ކުޅުން ދަށްވަމުން ދިއުމާ ގުޅިގެން، ކޯޗު ޕެޕް ގާޑިއޯލާ ޓީމުގެ އުސޫލުތަކަށް ބަދަލުތަކެއް ގެންނަން މަޖުބޫރުވިއެވެ.
އެގޮތުން ހޮނިހިރު ދުވަހުގެ މެޗުގައި ޓީމުގެ މުހިންމު ދެ ކުޅުންތެރިން ބެންޗުގައި ބޭތިއްބުމަށްފަހު، އުމަރު މާމޫޝްއަށް ފުރުސަތު ދިނުމުން އޭނާ ވަނީ އޭނާގެ ހުނަރުވެރިކަން ސާބިތުކޮށްދީފައެވެ.
ޕްރެމިއާ ލީގުގެ ތަށީގެ ރޭހުގައި ސިޓީ ފަހަތަށް ޖެހެމުންދާއިރު، ތަރި ފޯވާޑް އާލިން ހާލަންޑްގެ ލަނޑުޖެހުމުގެ ސިލްސިލާއަށް ވަނީ ހުއްޓުމެއް އައިސްފައެވެ. އަދި ފިލް ފޯޑަންގެ ކުޅުންވެސް ފަހަކަށް އައިސް ފެންނަނީ އޭނާގެ އަސްލު ފެންވަރަށްވުރެ ބަލިކަށިކޮށެވެ.
ތާވަލުގެ ފުލުގައި އޮތް ވުލްވްސްއާ ދެކޮޅަށް ކުޅުނު މެޗަކީ މި ދެ ކުޅުންތެރިންނަށް އަރާމުކުރަން ފުރުސަތު ދޭން އެންމެ ރަނގަޅު ވަގުތު ކަމަށް ގާޑިއޯލާއަށް ގަބޫލުކުރެވުނެވެ. އަދި އޭނާގެ މި ނިންމުމަކީ ރަނގަޅު ނިންމުމެއްކަން މެޗުގެ ނަތީޖާއިން ސާބިތުވިއެވެ.
ހާލަންޑުގެ ބަދަލުގައި ކުޅެން ނުކުތް އުމުރުން 26 އަހަރުގެ މިސްރުގެ ކުޅުންތެރިޔާ މާމޫޝް ވަނީ، ސިޓީން 2-0 އިން މޮޅުވި މި މެޗުގައި މި ސީޒަނުގެ އޭނާގެ ފުރަތަމަ ލީގު ލަނޑު ކާމިޔާބުކޮށްދީފައެވެ. މީގެން ދޭހަވަނީ ސީޒަނުގެ ބާކީ އޮތް ބައިގައި އޭނާއަކީ ޓީމަށް މުހިންމު ދައުރެއް އަދާކުރެވިދާނެ ކުޅުންތެރިއެއް ކަމެވެ.
މެޗުގެ އެންމެ ފަހު ވަގުތުކޮޅުގެ ތެރޭގައި މެޗުގެ މޮޅު ކުޅުންތެރިޔާގެ މަގާމު މާމޫޝްއަށް ލިބުމުން، އިއްތިހާދު ސްޓޭޑިއަމްގައި ތިބި ސަޕޯޓަރުންގެ ފަރާތުން ބޮޑު ތަރުހީބެއް ލިބިގެންދިޔައެވެ.
ވުލްވްސް މެޗުގެ ކުރިން، ކުރީގެ އައިންޓްރަކްޓް ފްރެންކްފާާޓްގެ ކުޅުންތެރިޔާ މި ސީޒަނުގައި ޖެހި ހަމައެކަނި ލަނޑަކީ އޮކްޓޫބަރު މަހު އީ.އެފް.އެލް ކަޕްގެ ހަތަރުވަނަ ބުރުގައި ސްވަންސީއާ ދެކޮޅަށް ޖެހި ލަނޑެވެ.
ހާލަންޑުގެ ކުޅުން އާދަޔާ ހިލާފަށް ރަނގަޅުވުމުގެ ސަބަބުން މި ސީޒަނުގައި މާމޫޝްއަށް ގިނައިން ފުރުސަތު ލިބިފައިވަނީ ބެންޗުން ކުޅެން އަރާ ކުޅުންތެރިއެއްގެ ގޮތުގައެވެ. ނަމަވެސް ހޮނިހިރު ދުވަހު މި މަންޒަރު ވަނީ މުޅިން ބަދަލުވެފައެވެ.
މާމޫޝް މެޗު ފެށިއިރު، ހާލަންޑް ކުޅެން އެރީ 73 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައެވެ. މިއާއެކު، އެންމެ ފަހުން ކުޅުނު އަށް މެޗުގައި ހާލަންޑަށް ކާމިޔާބު ކުރެވިފައިވަނީ އެންމެ ޕެނަލްޓީއެއްކަން ފާހަގަކޮށްލެވެއެވެ.
