ލިވަޕޫލްގެ ދަށް ކުޅުން ދެން އިތުރަށް ވަރުގަދަ ރެކޯޑުތަކުގެ ފަހަތުގައި ފޮރުވައެއް ނުބޭއްވޭނެ ކަމަށް ބުނެ އެކުލަބު ގެ ސަޕޯޓަރުން ފާޑު ކިޔަން ފަށައިފިއެވެ.

ބޯންމައުތާ ދެކޮޅަށް ކުޅުނު މެޗަށް ނުކުތްއިރު، ލިވަޕޫލަކީ ޔޫރަޕްގެ އެންމެ ވަރުގަދަ ފަސް ލީގުގެ ތެރެއިން ބަލިނުވެ އެންމެ ގިނަ މެޗު ހަމަކުރި ޓީމެވެ. މިއީ އާންމުކޮށް މައްސަލަތަކެއް އުޅޭ ޓީމަކުން ފެންނާނެ ކަމެއް ނޫނެވެ.

ނަމަވެސް، މެޗުގެ 95 ވަނަ މިނެޓުގައި އަމީން އަދްލީ ބޯންމައުތަށް މޮޅުވި ލަނޑު ކާމިޔާބުކޮށްދިނުމާއެކު، ލިވަޕޫލުން ބަލިނުވެ ފުރިހަމަކުރި 13 މެޗުގެ ފަހަތުގައި ފޮރުވިފައި އޮތް ހަގީގީ މައްސަލަތައް ފާޅުވެގެން ދިޔައެވެ.

އެންމެ ފަހުގެ ޗެމްޕިއަނުން މިހާރު ވަނީ ޕްރިމިއަރ ލީގުގައި އެންމެ ފަހުން ކުޅުނު ފަސް މެޗުންވެސް މޮޅެއް ނުލިބިފައެވެ. އެއީ ހަތަރު މެޗު އެއްވަރުވެ، އެއް މެޗުން ބަލިވުމެވެ.

އާސެނަލްއާ އެއްވަރުވި މެޗު ފިޔަވައި، ދެން ކުޅުނު ހަތަރު މެޗަކީ ލީޑްސް، ބާންލީ، ފުލަމް އަދި ބޯންމައުތާ ދެކޮޅަށް ކުޅުނު މެޗުތަކެވެ.

މިއީ މިހާރު އެހެން ޓީމުތަކުން ޖެހިލުންވާ ފަދަ ވަރުގަދަ ލިވަޕޫލެއް ނޫނެވެ. މިދިޔަ ސީޒަނުގައި ލީގު ކާމިޔާބުކުރިއިރު އެޓީމުން ފެނުނު ހައިބަތާއި ވަރުގަދަކަން މިހާރު ވަނީ ގެއްލިފައެވެ. މި މެޗުގައި އެޓީމުގެ ޑިފެންސް ފެނުނީ ވަރަށް ބަލިކަށިކޮށް ކަމަށްވާއިރު، އެޓޭކިންގް ގޭމް ފެނުނީ ވަރަށް އާދައިގެ ގޮތަކަށެވެ.

ލިވަޕޫލްގެ ހުރިހާ ދިމާލަކުންވެސް މައްސަލަތައް އެބަހުއްޓެވެ. މާ ގިނަ ގޯސްތައް ހެދެމުންދާއިރު، ދިފާއީ ގޮތުން އެޓީމު އޮތީ ވަރަށް ބަލިކަށިކޮށެވެ. މޮޅުވި ލަނޑުންވެސް އެކަން ސާފުވެއެވެ. ސެޓް-ޕީސްތަކުން ދެ ލަނޑު ޖެހި ނަމަވެސް، އާންމު ކުޅުމުގެ ތެރެއިން އެކަށީގެންވާ ވަރުގެ ނުރައްކާތެރި ފުރުސަތުތަކެއް އުފެއްދިފައެއް ނުވެއެވެ.

އެންޑޯނީ އިރައޯލާގެ ބޯންމައުތަށް އަނިޔާގެ ގިނަ މައްސަލަތަކެއް ކުރިމަތިވެފައިވާއިރު، އެންޓޮއިން ސެމެންޔޯ މެންޗެސްޓަރ ސިޓީއަށް ބަދަލުވުމުން އެޓީމަށް ވަނީ އިތުރު ހީނަރުކަމެއް އައިސްފައެވެ.

އެޓީމު މި މެޗަށް ނުކުތީ އެންމެ ފަހުން ކުޅުނު 14 މެޗުން އެންމެ މޮޅެއް ހޯދައިގެން ކަމަށްވީ ނަމަވެސް، ލިވަޕޫލްގެ ބަލިފައިތައް އެޓީމުން ވަނީ ވަރަށް ރަނގަޅަށް ހާމަކޮށްދީފައެވެ.

އިވާނިލްސަން ކާމިޔާބުކުރި ފުރަތަމަ ލަނޑުގައި ވާޖިލް ފެން ޑައިކް ހެދި ގޯހަކީ ސަލާމަތްކުރެވޭނެ ގޯހެކެވެ. ނަމަވެސް، ކޯޗު އާން ފްލޮޓް ބުނި ގޮތުގައި އެވަގުތު ހުރި ގަދަ ވަޔަކީ އެކަމަށް ދިމާވި ސަބަބެކެވެ.