މިޔަންމާގައި މިހާރު ހިނގަމުންދާ ނުރައްކާތެރި ދާޚިލީ ހަނގުރާމައިގެ ތެރޭގައި، ގިނަ ބައެއްގެ ފާޑުކިޔުން އަމާޒުވެފައިވާ އާންމު އިންތިޚާބުގެ ތިންވަނަ އަދި ފަހު ބުރުގެ ވޯޓުލުން ފަށައިފިއެވެ.
މި އިންތިޚާބުގައި އެ ގައުމުގެ އަސްކަރިއްޔާގެ ފުރިހަމަ ތާއީދު އޮންނަ ޕާޓީން ބޮޑު ތަފާތަކުން ކާމިޔާބީ ހޯދާނެ ކަމަށް ވަނީ ބެލެވިފައެވެ.
އާދީއްތަ ދުވަހުގެ ހެނދުނު ރާއްޖެގަޑިން 4:30 (އެ ގައުމުގެ ގަޑިން ހެނދުނު 6:00) އިން ފެށިގެން ޔަންގޫން އާއި މަންޑަލޭ ފަދަ ބޮޑެތި ސިޓީތައް ހިމެނޭހެން 60 އަވަށެއްގައި ވޯޓުލުން ވަނީ ފަށާފައެވެ.
މި އިންތިޚާބަކީ މިނިވަން އަދި އިންސާފުވެރި އިންތިޚާބެއް ނޫން ކަމަށް ބުނެ ބައިނަލްއަގުވާމީ ފަރާތްތަކުންނާއި ފާޑުކިޔާ ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
އެ ފަރާތްތަކުން ސިފަކުރާ ގޮތުގައި، މިއީ މީގެ ފަސް އަހަރު ކުރިން އަންގް ސަން ސޫޗީގެ އިންތިޚާބީ ސަރުކާރު ބަޣާވާތަކުން ވައްޓާލުމަށްފަހު، އަސްކަރީ ވެރިކަމަށް ގާނޫނީ ސިފައެއް ޖެއްސުމަށް ކުރާ މަސައްކަތެކެވެ.
އެ ބަޣާވާތާ ގުޅިގެން އުފެދުނު ދާޚިލީ ހަނގުރާމައިގައި މިހާތަނަށް އެތައް ހާސް ބަޔަކު މަރުވެ، 3.5 މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ދާންޖެހިފައެވެ.
އަންގް ސަން ސޫޗީ އަދިވެސް ހުންނެވީ އަސްކަރިއްޔާގެ ބަންދުގައެވެ. އަދި އޭނާގެ ޕާޓީ، ނެޝަނަލް ލީގު ފޯ ޑިމޮކްރަސީ (އެން.އެލް.ޑީ) އާއި އިދިކޮޅު އެހެން ބައެއް ޖަމާއަތްތައް އުވާލާފައިވުމުން، އިންތިޚާބުގެ ކާމިޔާބީ ވަނީ އަސްކަރިއްޔާގެ ތާއީދު އޮންނަ ޔޫނިއަން ސޮލިޑަރިޓީ އެންޑް ޑިވެލޮޕްމަންޓް ޕާޓީ (ޔޫ.އެސް.ޑީ.ޕީ) އަށް ވަރަށް ބޮޑަށް ފަހިވެފައެވެ.
އިލެކްޝަން ކޮމިޝަނުން ހާމަކޮށްފައިވާ އެންމެ ފަހުގެ މައުލޫމާތަށް ބަލާއިރު، ޔޫ.އެސް.ޑީ.ޕީ އިން ވަނީ މިހާތަނަށް ތިރީ މަޖިލީހުގެ 209 ގޮނޑީގެ ތެރެއިން 193 ގޮނޑި އަދި މަތީ މަޖިލީހުގެ 78 ގޮނޑީގެ ތެރެއިން 52 ގޮނޑި ކާމިޔާބުކޮށްފައެވެ.
މީގެ އިތުރުން، އެ ގައުމުގެ ގާނޫނުއަސާސީގެ ދަށުން އަސްކަރިއްޔާއަށް ޚާއްސަކުރެވިފައިވާ 166 ގޮނޑިއާއެކު، މިހާރުވެސް އެ ދެ ފަރާތް ގުޅިގެން ޖުމްލަ 400 އެއްހާ ގޮނޑި ވަނީ ކަށަވަރުކޮށްފައެވެ. މިއީ ސަރުކާރެއް އެކުލަވާލުމަށް ބޭނުންވާ 294 ގޮނޑިއަށްވުރެ މާ އިތުރު އަދަދެކެވެ.
އަސްކަރިއްޔާއިން އިއުލާނުކޮށްފައިވާ ގޮތުގައި، އަންނަ މާރިޗު މަހުގެ ތެރޭގައި އާ ގާނޫނު ހަދާ މަޖިލިސް އެކުލަވާލައި، އޭޕްރީލް މަހުގެ ތެރޭގައި އާ ސަރުކާރުން ރަސްމީކޮށް މަސައްކަތް ފަށާނެއެވެ.
