ކެނެޑާގެ ބޮޑުވަޒީރު މާކް ކާނީ ޗައިނާއާއެކު ވިޔަފާރީގެ އެއްބަސްވުމެއް ގާއިމުކުރައްވައިފިނަމަ، ކެނެޑާއިން އެމެރިކާއަށް އެތެރެކުރާ މުދަލުން ސަތޭކަ އިންސައްތައިގެ ޓެރިފެއް (އިމްޕޯޓް ޑިއުޓީއެއް) ނަގާނެކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.

ހޮނިހިރު ދުވަހުގެ ހެނދުނު "ޓްރޫތް ސޯޝަލް" ގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ޗައިނާގެ މުދާ އެމެރިކާއަށް ފޮނުވުމަށް ބޭނުންކުރާ ބަނދަރަކަށް ކެނެޑާ ހެދިދާނެ ކަމަށް ކާނީ ގަބޫލުކުރައްވާނަމަ އެއީ ވަރަށް ބޮޑު ކުށްހީއެއް ކަމަށެވެ.

"ކެނެޑާއިން ޗައިނާއާއެކު އެއްބަސްވުމެއް ހަދައިފިނަމަ، އެމެރިކާއަށް އެތެރެކުރާ ކެނެޑާގެ ހުރިހާ މުދަލަކުން ވަގުތުން ސަތޭކަ އިންސައްތައިގެ ޓެރިފެއް ނަގަން ފަށާނެ،" ޓްރަމްޕް ލިޔުއްވާފައިވެއެވެ.

މި ޕޯސްޓުގައި ޓްރަމްޕް ވަނީ ކާނީއަށް "ބޮޑުވަޒީރު" ގެ ބަދަލުގައި "ގަވަރުނަރު" ގެ ނަމުން މުޚާތަބު ކުރައްވާފައެވެ.

ޓްރަމްޕްގެ މި ވާހަކަތަކާ ގުޅިގެން އަލްޖަޒީރާއިން ކުރި ސުވާލުތަކަށް ކާނީގެ އޮފީހުން ވަގުތުން ޖަވާބެއް ދީފައެއް ނުވެއެވެ. ނަމަވެސް، ކެނެޑާ-އެމެރިކާ ވިޔަފާރިއާ ބެހޭ ވަޒީރު ޑޮމިނިކް ލެބްލޭންކް "އެކްސް" ގައި ވިދާޅުވީ، ޗައިނާއާއެކު މިނިވަން ވިޔަފާރީގެ އެއްބަސްވުމެއް ގާއިމުކުރުމުގެ އެއްވެސް މަސައްކަތެއް ކުރިއަށް ނުދާ ކަމަށެވެ.

ޓްރަމްޕްގެ މި އިންޒާރު އައިސްފައިވަނީ، ސްވިޒަލޭންޑްގެ ދާވޯސްގައި ބޭއްވި ވޯލްޑް އިކޮނޮމިކް ފޯރަމްގައި ކާނީ ދެއްވި ތަގުރީރާ ގުޅިގެން ދެ ގައުމުގެ ދެމެދުގައި ނުތަނަވަސްކަން އިތުރުވެފައިވާ ދަނޑިވަޅެއްގައެވެ. ކާނީގެ އެ ތަގުރީރަކީ ޓްރަމްޕްގެ ސަރުކާރުގެ ސިޔާސަތުތަކަށް ރައްދު ދެއްވައި ދެއްވި ތަގުރީރެއް ކަމަށް ގިނަ ބަޔަކު ގަބޫލުކުރެއެވެ.

2025 ވަނަ އަހަރުގެ ޖެނުއަރީ މަހު ޓްރަމްޕް ރަސްމީކޮށް ވެރިކަމާ ހަވާލުވެވަޑައިގަތުމުގެ ކުރިންވެސް ކެނެޑާގެ މުދަލުން ބޮޑެތި ޓެކްސްތައް ނަގާނެ ކަމުގެ އިންޒާރު ދެއްވަމުން ގެންދެވިއިރު، ކެނެޑާއަކީ އެމެރިކާގެ "51 ވަނަ ސްޓޭޓް" އަށް ހަދަން ބޭނުންވާ ކަމަށްވެސް އޭނާ ވަނީ ތަކުރާރުކޮށް ވިދާޅުވެފައެވެ.