އެމެރިކާގެ މިނިއާޕޮލިސްގައި ހިޖުރަވެރިންނާ ދެކޮޅަށް ފަށާފައިވާ ހާއްސަ އޮޕަރޭޝަނެއްގެ ތެރެއިން، ފެޑަރަލް އެޖެންޓުން ބަޑިޖަހައި އެމެރިކާގެ އިތުރު މީހަކު މަރާލައިފި ކަމަށް ކަމާބެހޭ އިދާރާތަކުން ހާމަކޮށްފިއެވެ. މި ހާދިސާއާ ގުޅިގެން އެ ސިޓީގައި ބޮޑެތި މުޒާހަރާތަކެއް ފެށިފައިވާއިރު، މިނެސޯޓާ ސްޓޭޓުން ހަތިޔާރު އެޅި ފެޑަރަލް އޮފިސަރުން ވަގުތުން ބޭރުކުރުމަށް ރައީސް ޑޮނަލްޑް ޓްރަމްޕަށް ދަނީ ގޮވާލަމުންނެވެ.

މިނިއާޕޮލިސްގެ ޕޮލިސް ޗީފް ބްރަޔަން އޯހާރާ ނޫސްވެރިންނަށް މައުލޫމާތު ދެއްވަމުން ވިދާޅުވީ، ހޮނިހިރު ދުވަހު ބަޑީގެ ހަމަލާތަކެއް އަމާޒުވެގެން ހޮސްޕިޓަލުގައި ފަރުވާދެމުން ދަނިކޮށް މަރުވީ އުމުރުން 37 އަހަރުގެ ފިރިހެނެއް ކަމަށެވެ. އަދި އެއީ އެމެރިކާގެ ރައްޔިތެއްކަންވެސް އޭނާ ކަށަވަރުކޮށްދެއްވިއެވެ.

މަރުވި މީހާގެ މައިންބަފައިން ބުނި ގޮތުގައި އެއީ އިންޓެންސިވް ކެއާ ޔުނިޓް (އައި.ސީ.ޔޫ) އެއްގައި ނަރުހެއްގެ ގޮތުގައި މަސައްކަތް ކުރަމުންދިޔަ އެލެކްސް ޕްރެޓީއެވެ.

މި ހާދިސާ ހިނގާފައިވަނީ ޓްރަމްޕްގެ ސަރުކާރުން ހިޖުރަވެރިންނާ ދެކޮޅަށް ގެންގުޅޭ ހަރުކަށި ސިޔާސަތުގެ ދަށުން، މިނިއާޕޮލިސްގައި ފެޑަރަލް އެޖެންޓުން ހަރަކާތްތެރިވެ ރޭޑްތައް ކުރިއަށްގެންދާތާ ހަފުތާތަކެއް ވެފައިވަނިކޮށެވެ. އަދި މިއީ މިދިޔަ ޖެނުއަރީ މަހުގެ 7 ވަނަ ދުވަހު އިމިގްރޭޝަން އެންޑް ކަސްޓަމްސް އެންފޯސްމަންޓް (އައި.ސީ.އީ) އޮފިސަރަކު ބަޑިޖަހައި އުމުރުން 37 އަހަރުގެ ރެނީ ގުޑް މަރާލި ހާދިސާއާ ގުޅިގެން އެ ސިޓީގައި ކޮންމެ ދުވަހަކު މުޒާހަރާ ކުރަމުންދާ ދަނޑިވަޅެކެވެ.

މީގެ އިތުރުން، މިދިޔަ ހަފުތާގައިވެސް އެ ސިޓީގައި ހިނގި ވަކި ހާދިސާއެއްގައި ފެޑަރަލް އެޖެންޓުން ވަނީ ވެނެޒުއޭލާގެ މީހަކަށް ބަޑިން ހަމަލާދީފައެވެ. ޑިޕާޓްމަންޓް އޮފް ހޯމްލޭންޑް ސެކިއުރިޓީ (ޑީ.އެޗް.އެސް) އިން ބުނާ ގޮތުގައި، އެމެރިކާގެ ބޯޑަރ ޕެޓްރޯލް އެޖެންޓަކު ބަޑިޖެހީ އަތްބަޑިއެއް ހިފައިގެން ހުރި މީހަކު ހަތިޔާރު ބަހައްޓަން އެންގުމުން އެކަމަށް އިންކާރު ކުރުމުންނެވެ.

ފެޑަރަލް އޮފިޝަލުން ހާމަކުރި ގޮތުގައި ޕްރެޓީގެ ގަޔަށް ބަޑިޖެހީ ބޯޑަރ ޕެޓްރޯލްގައި އަށް އަހަރު ދުވަހު މަސައްކަތް ކޮށްފައިވާ ތަޖުރިބާކާރު އޮފިސަރެކެވެ. ނަމަވެސް، އެ ސަރަހައްދުގައި ތިބި މީހުން ނަގާފައިވާ ވީޑިއޯތަކުން ފެންނަ ގޮތުގައި، ބަޑިޖެހި ވަގުތު ޕްރެޓީ ހުރީ މަގުމަތީގައި މަޑުކޮށްލައިގެން އޭނާގެ މޯބައިލް ފޯނުން އެޖެންޓުންގެ ވީޑިއޯ ނަގާށެވެ.