ދެކުނު އޭޝިއާގެ ގައުމުތަކުގެ މެދުގައި ބޭއްވި ފުރަތަމަ ސާފު ފުޓްސަލް މުބާރާތުގެ ތަށި ރާއްޖޭން އުފުލާލީ، މުބާރާތުގައި ބާކީ އެއް މެޗު އޮއްވައެވެ.

މި ތާރީޚީ ކާމިޔާބީ ރާއްޖެއަށް ޔަގީންވީ، މިއަދު ބޫޓާނާ ދެކޮޅަށް ކުޅުނު ފޯރިގަދަ މެޗު 3-1 ގެ ނަތީޖާއަކުން ކާމިޔާބު ކުރުމާ ގުޅިގެންނެވެ. މި މޮޅާއެކު، މުބާރާތުގައި ރާއްޖޭން ކުޅުނު އެއްވެސް މެޗަކުން ބަލިނުވެ، ތާވަލުގެ އެއްވަނައިގައި އޮވެ ރާއްޖޭން ވަނީ މުބާރާތުގެ ޗެމްޕިއަންކަން ކަށަވަރުކޮށްފައެވެ.

މި މުބާރާތުގައި ރާއްޖޭގެ ދަތުރު ފެށީ ވަރަށް ވަރުގަދަކޮށެވެ. ފުރަތަމަ މެޗުގައި ޕާކިސްތާން އަތުން 7-1 އިން ބޮޑު މޮޅެއް ހޯދިއިރު، ދެވަނަ މެޗުގައި އަވަށްޓެރި އިންޑިއާގެ މައްޗަށް ކުރިހޯދީ 5-0 އިންނެވެ. ތިންވަނަ މެޗުގައި ބަންގްލަދޭޝް 6-1 އިން ބަލިކުރިއިރު، ހަތަރުވަނަ މެޗުގައި ވަރުގަދަ ނޭޕާލް އަތުން 2-1 އިން މޮޅުވެ ރާއްޖޭން ވަނީ ތަށި ހޯދުމަށް ބޮޑު ފިޔަވަޅެއް އަޅާފައެވެ.

މި މެޗުގައި ފުރަތަމަ ލަނޑުޖަހައި ލީޑުނެގީ ބޫޓާން ޓީމުންނެވެ. ހާފުގެ 12 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖިގްނޭ ޝުލްޓްރިމްއެވެ.

މި ހާފުގައި ރާއްޖޭން އެއްވަރު ކުރި ލަނޑު ކާމިޔާބުކޮށްދިނީ އަބްދުﷲ ޖުނައިދު (ޖެންނޭ) އެވެ. ދެ ވަނަ ލަނޑު ލިބުނު ހިލޭ ޖެހުމެއްގައި ބޯޅަ ގޯލުގެ ތެރެއަށް ފޮނުވާލައިގެން ކާމިޔާބުކޮށްދިނީ އަހްމަދު ހަމީދު (އައްމަޑޭ) އެވެ.

ރާއްޖެއިން މެޗުގައި ޖެހި ތިންވަނަ ލަނޑަކީ، ދެވަނަ ހާފުގެ 16 ވަނަ މިނެޓުގައި ކެޕްޓަން މުޙައްމަދު އިމްރާން (އިންމި) ކާމިޔާބުކޮށްދިން ލަނޑެކެވެ.

ރާއްޖެއިން ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ހޯދާފައި މިވަނީ މިހާތަނަށް ކުޅުނު ފަސް މެޗުން ވެސް މޮޅުވެ ޖުމްލަ 15 ޕޮއިންޓާއެކުއެވެ. ދެވަނައިގައި އޮތް ޕާކިސްތާނަށް ބާކީ އެއް މެޗު އޮތްއިރު، ފަސް މެޗުން ލިބިފައި ވަނީ 10 ޕޮއިންޓެވެ. ދެން އޮތް މެޗު ކާމިޔާބުކުރި ނަމަވެސް ޕާކިސްތާނަށް ލިބޭނީ 13 ޕޮއިންޓެވެ.

މި ކާމިޔާބީއާއެކު، ފުޓްސަލްގައި މި ސަރަހައްދުގެ "ރަސްގެފާނަކީ" އަދިވެސް މި ކުޑަކުޑަ ދިވެހިރާއްޖެކަން މުޅި އޭޝިއާއަށް ވަނީ ސާބިތުކޮށްދީފައެވެ. ވަސީލަތްތަކުގެ ގޮތުން ބަލާއިރު، އަމިއްލަ ގައުމުގައި ފަރިތަކޮށްލާނެ އެކަށީގެންވާ އިންޑޯ ޕިޗެއް ނެތި، އަދި ގައުމީ ކުޅިވަރު އެވޯޑްތަކުގައި ވެސް ހިމެނޭ ކުޅިވަރަކަށް ނުވީ ނަމަވެސް، ދިވެހި ކުޅުންތެރިން ދެއްކި ހިތްވަރަށް ގިނަ ބައެއްގެ ތައުރީފު އަންނަނީ ލިބެމުންނެވެ.

ރާއްޖޭގައި ފުޓްސަލްއަކީ އާންމުންގެ މެދުގައި ވަރަށް ބޮޑު ތަރުހީބެއް އޮންނަ، ގިނަ ބަޔަކު ލޯބިކުރާ ކުޅިވަރެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުޅިވަރަށް ދެއްވާ އަހަންމިއްޔަތުގެ ދަށުން، މިފަދަ ބައިނަލްއަގުވާމީ ކާމިޔާބީތައް އިތުރުކުރުމަށް ގިނަ މަސައްކަތްތަކެއް ދަނީ ކުރެވެމުންނެވެ.

މުބާރާތުގެ ޗެމްޕިއަންކަން ކަށަވަރުވެފައިވީ ނަމަވެސް، ތާވަލުގެ ފަހު މެޗުގައި ރާއްޖެ ނުކުންނާނީ ސްރީލަންކާއާ ދެކޮޅަށެވެ. މިއީ ސާފް ސަރަހައްދުގައި ފުޓްސަލް މުބާރާތެއް ބޭއްވި ފުރަތަމަ ފަހަރު ކަމަށްވާއިރު، މި ފުރަތަމަ މުބާރާތުގެ ތަށި ރާއްޖޭން ކާމިޔާބު ކުރުމަކީ ދިވެހި ކުޅިވަރުގެ ތާރީޚުގައި ލިޔެވިގެންދާނެ ރަން އަކުރުތަކެކެވެ.