އިސްރާއީލުން އުޅެނީ އީރާނަށް ހަމަލާދޭނެ ފުރުސަތަކަށް ބަލަބަލާ ކަމުގައި ތުރުކީވިލާތުގެ ޚާރިޖީ ވަޒީރު ހާކާން ފިދާން ވިދާޅުވެއްޖެއެވެ.
ތުރުކީވިލާތުގެ ޚާރިޖީ ވަޒީރު ހާކާން ފިދާން ވިދާޅުވި ގޮތުގައި، އިސްރާއީލުން އީރާނަށް ހަމަލާދިނުމަށް ފުރުސަތަކަށް ބަލަމުންދާކަމުގެ ނިޝާންތައް ފެންނަން އެބަހުއްޓެވެ. އަދި މިފަދަ ފިޔަވަޅެއްގެ ސަބަބުން ސަރަހައްދުގެ ހަމަޖެހުން އިތުރަށް ގެއްލިގެން ހިނގައިދާނެކަމުގެ އިންޒާރު އޭނާ ދެއްވިއެވެ.
ހުކުރު ދުވަހު ތުރުކީގެ އެން.ޓީ.ވީ އަށް ދެއްވި ބަސްދީގަތުމެއްގައި ފިދާން ވިދާޅުވީ، އިސްރާއީލުން މިކަމަށްޓަކައި އެހެން މަގެއް ޚިޔާރުކުރާނެ ކަމަށް އުންމީދު ކުރެއްވި ނަމަވެސް، ހަގީގަތަކީ އިސްރާއީލުން އީރާނަށް ހަމަލާދޭނެ ފުރުސަތަކަށް ވަރަށް ބޮޑަށް ބަލަމުންދާ ކަމަށެވެ.
މިކަމަކީ އެމެރިކާއާއި އިސްރާއީލު ގުޅިގެން ކުރަން އުޅޭ ކަމެއްތޯ ސުވާލުކުރުމުން، "ތުރުކިޔޭ ޓުޑޭ" ނޫހުން ރިޕޯޓްކޮށްފައިވާ ގޮތުގައި ފިދާން ވިދާޅުވީ، ޚާއްޞަގޮތެއްގައި އިސްރާއީލުން މިފަދަ ފުރުސަތަކަށް ފާރަލަމުންދާ ކަމަށެވެ.
ޚާރިޖީ ވަޒީރު އިތުރަށް ވިދާޅުވީ، ދާދި ފަހުން އީރާނަށް ކުރެއްވި ޒިޔާރަތުގައި އެ ގައުމުގެ އޮފިޝަލުންނާ ބައްދަލުކުރައްވައި މި ކަންބޮޑުވުންތައް ސީދާ ހިއްސާކުރައްވާފައިވާ ކަމަށެވެ.
"އަޅުގަނޑު މިދިޔަ ދުވަސްތަކުގައި ތެހެރާނަށް ދިޔައިރު، އެކުވެރިއެއްގެ ހައިސިއްޔަތުން ހުރިހާ ވާހަކައެއް ކިޔައިދިނިން. އެނގިވަޑައިގަންނަވާނެ ފަދައިން، އެކުވެރިން އަބަދުވެސް ބުނާނީ ހިތި ހަގީގަތްތައް،" ފިދާން ވިދާޅުވިއެވެ.
ފިދާންގެ މި އިންޒާރު މި އައީ، ތުރުކީގެ ރައީސް ރަޖަބު ތައްޔިބު އުރުދުޣާން އީރާނުގެ ރައީސް މަސްޢޫދު ޕެޒެޝްކިއާންއާ ފޯނުން ގުޅުއްވައި ދެއްކެވި ވާހަކަފުޅަށް ފަހުގައެވެ.
އެ ފޯނު ކޯލުގައި އުރުދުޣާން ވިދާޅުވީ، އީރާނުގެ ދާޚިލީ ކަންކަމަށް ބޭރުގެ އެއްވެސް ފަރާތަކުން ވަދެގަތުމާ ތުރުކީ ދެކޮޅު ކަމަށާއި، އަވަށްޓެރި އީރާނުގެ ސުލްހަވެރިކަމާއި ހަމަޖެހުމަށް ތުރުކީން އިސްކަންދޭ ކަމަށެވެ.
މީގެ އިތުރުން، އީރާނުގެ އިސް އޮފިޝަލަކު ރޮއިޓާސް ނިއުސް އެޖެންސީއަށް ހުކުރު ދުވަހު ވިދާޅުވީ، ދުޝްމަނުން ދޭ ކޮންމެ ހަމަލާއަކަށްވެސް އީރާނުން ރައްދުދޭނީ "ފުރިހަމަ ހަނގުރާމައެއްގެ" ގޮތުގައި ކަމަށެވެ. މިއީ އެމެރިކާއާއި އީރާނުގެ ލީޑަޝިޕާ ދެމެދު ބަހުގެ ހަމަލާތައް ވަރުގަދަވެފައިވާ ދަނޑިވަޅެއްގައި ދީފައިވާ އިންޒާރެކެވެ.
