ބްރެޒިލްގެ ރައީސް ލުއިޒް އިނާސިއޯ "ލޫލާ" ދަ ސިލްވާ، އެމެރިކާގެ ރައީސް ޑޮނަލްޑް ޓްރަމްޕް "އައު އދ އެއް" އުފައްދަން މަސައްކަތްކުރައްވާ ކަމަށް ތުހުމަތުކުރައްވައިފިއެވެ.
މި ތުހުމަތު އައިސްފައިވަނީ ސްވިޒަލޭންޑުގައި ޓްރަމްޕްގެ އައު "ބޯޑް އޮފް ޕީސް" އިފްތިތާހުކުރެއްވިތާ ކުޑަ ދުވަސްކޮޅެއްގެ ތެރޭގައެވެ.
ހުކުރު ދުވަހު ދެއްވި ތަޤުރީރެއްގައި ލޫލާ ވިދާޅުވީ، އދ. އިޞްލާޙުކުރުމުގެ ބަދަލުގައި ފެނިގެންދަނީ، އަމިއްލަ ފުރިހަމަ ބާރު ހިނގާފަދަ އައު އދ. އެއް އުފެއްދުމަށް ޓްރަމްޕް ހުށަހަޅުއްވަމުން ގެންދަވާ މަންޒަރު ކަމަށެވެ.
ދުނިޔޭގެ ކަންކަމުގައި "ޖަންގަލީގެ އުޞޫލު" ގެންގުޅުމާ ދެކޮޅަށް ވާހަކަދައްކަވަމުން، ޤައުމުތަކުން ގުޅިގެން މަސައްކަތްކުރުމުގެ މުހިންމުކަން ލޫލާ ފާހަގަކުރެއްވިއެވެ. އަދި އދ. ގެ ޗާޓަރު މިއަދު އޮތީ ވީދިފައި ކަމަށް ވިދާޅުވެ އޭނާ އިންޒާރު ދެއްވިއެވެ.
ލޫލާ މިފަދައިން ވިދާޅުވެފައިވަނީ، ޗައިނާގެ ރައީސް ޝީ ޖިންޕިންއާ ފޯނުން ގުޅުއްވައި މަޝްވަރާކުރެއްވިތާ އެއް ދުވަސް ފަހުންނެވެ.
އެ މަޝްވަރާގައި ޝީ ވަނީ ބައިނަލްއަޤްވާމީ ކަންކަމުގައި އދ. އިން އަދާކުރާ މަރުކަޒީ ދައުރު ހިމާޔަތްކުރުމަށް ބްރެޒިލްގެ ރައީސަށް ބާރުއަޅުއްވާފައެވެ.
ލޫލާގެ މި ވާހަކަތައް އަމާޒުވެފައިވަނީ، އެމެރިކާ އިން އދ. ގެ ގިނަ އިދާރާތަކަކުން ވަކިވަމުންދާ ދަނޑިވަޅެއްގައެވެ. މީގެ އިތުރުން، ޓްރަމްޕްގެ "އެމެރިކާ ފަސްޓް" ސިޔާސަތުގެ ދަށުން ވިޔަފާރީގެ ޓެކްސްތަކާއި އަސްކަރީ ބިރުދެއްކުންތަކާއެކު ދުނިޔޭގެ ސިޔާސީ މަސްރަޙަށް ނުފޫޒު ފޯރުވަމުންދާތީ، އެމެރިކާގެ ބައިވެރިންވެސް މިހާރު އެ ޤައުމަށް އިތުބާރު ކުރެވިދާނެތޯ ސުވާލު އުފައްދަމުންދާ ދަނޑިވަޅެއްގައެވެ.
ޓްރަމްޕް މި "ބޯޑް" އިފްތިތާހުކުރެއްވީ ސްވިޒަލޭންޑުގެ ދާވޯސްގައި ބޭއްވުނު ވޯލްޑް އިކޮނޮމިކް ފޯރަމްގެ އަހަރީ ބައްދަލުވުމުގެ ތެރެއިން ބުރާސްފަތި ދުވަހުއެވެ. މި ފޯރަމަކީ އދ. ގެ ނިޒާމަށް އޮތް ބަދަލެއްގެ ގޮތުގައި ފަހަކަށް އައިސް ބެލެވެމުންދާ ބައިނަލްއަޤްވާމީ ޖަމާޢަތެކެވެ.
