އަށާރަ އެކަޑަމީ އަކާއެކު "އަންޑާ 14 ޗެމްޕިއަންޝިޕް 2026" އަންނަ މަހު 5 ގައި ފެށުމަށް ނިންމައިފިއެވެ.

އަންނަ މަހުގެ ފަސް ވަނަ ދުވަހު މި މުބާރާތް ފަށަން ނިންމާފައިވާއިރު، މުބާރާތުގެ ގުރުއަތުލުން އިއްޔެ އެފްއޭއެމްއިން ވަނީ ބާއްވާފައެވެ.

މުބާރާތުގެ ފޯމެޓް ރާވާފައިވަނީ 18 ޓީމު ތިން ގްރޫޕަކަށް ބަހާ ގޮތަށެވެ. އެއީ، ގްރޫޕެއްގައި ހަ ޓީމު ވާދަކުރާ ގޮތަށެވެ. އަދި، ކޮންމެ ގްރޫޕަކުން އެންމެ ރަނގަޅު ތިން ޓީމެއްގެ އިތުރުން، ތިން ގްރޫޕްގެ ހަތަރު ވަނަ ޓީމުތަކުގެ ތެރެއިން އެންމެ ރަނގަޅު ނަތީޖާ ނެރޭ ޓީމެއް ހިމެނޭ ގޮތަށް، 10 ޓީމުގެ މެދުގައި ކުރިއަށްދާނީ ލީގު ބުރެކެވެ. ލީގު ބުރަށް ފަހު، އެންމެ ގިނަ ޕޮއިންޓް ހޯދާ ޓީމަށް ޗެމްޕިއަންކަން ލިބޭނެ އެވެ.

މި މުބާރާތުގައި ކޮންމެ ޓީމެއްގައިވެސް 25 ކުޅުންތެރިންނާއި އަށް އޮފިޝަލުންނާއެކު ޖުމްލަ ހަ ސަތޭކަ އަށް ވުރެން ގިނަ މީހުން މިކަމުގައި ޝާމިލުވާނެ އެވެ. އަދި މިއީ 14 އަހަރުން ދަށުގެ އުމުރުފުރާއަށް އަމާޒުކޮށް ރާއްޖޭގައި ބާއްވާ އެންމެ ބޮޑު ފުޓްބޯޅަ މުބާރާތެވެ.

މުބާރާތުގެ މެޗުތައް ހަފްތާ ބަންދުގައި ކުޅޭ ގޮތަށް ހަމަޖެހިފައިވާއިރު، މެޗުތަކުގައި ތިރީސް މިނެޓުގެ ދެ ހާފް ކުޅުމަށް ހަމަޖެހިފައިވެއެވެ.

ގްރޫޕްތައް ބެހިފައިވާ ގޮތަށް ބަލާއިރު، ގްރޫޕް އެކެއްގައި ހިމެނެނީ، ޔުނައިޓެޑް ވިކްޓަރީ، އޮޑި އެކަޑަމީ، އަޝްފާގު އެކަޑަމީ، ވިލިމާލެ ޔުނައިޓެޑް އެކަޑަމީ، ހުޅުމާލެ ޔޫތު އެންޑް ސްޕޯޓްސް ކްލަބް (އެޗްވައިއެސްސީ)، އަދި ބިސް ބުރު ސްޕޯޓްސް ކްލަބް އެވެ.

ގްރޫޕް ދޭއްގައި ހިމެނެނީ، އީގަލްސް އެކަޑަމީ (އެސްޕަޔާ އެކަޑަމީ)، ޓީސީ ސްޕޯޓްސް ކްލަބް، ބީޖީ އެކަޑަމީ، އެޑްވެންޗާ ފުޓްބޯލް އެކަޑަމީ، ޖޫނިއާ ފުޓްބޯލް އެކަޑަމީ އަދި މަހިބަދޫ ސްޕޯޓްސް ކްލަބް އެކަޑަމީއެވެ.

ގުރޫޕް ތިނެއްގައި ހިމެނެނީ ކުލަބު ވެލެންސިއާ، މާޒިޔާ ސްޕޯޓްސް އެކަޑަމީ، ހުޅުމާލެ ސްޓާސް އެކަޑަމީ، ހުއްރިއްޔާ އެކަޑަމީ، ފްރެންޑްސް ފުޓްބޯލް ފެމިލީ އެކަޑަމީ އަދި މޯލްޑިވްސް ސޮކަމޭޓްސް އެކަޑަމީއެވެ.