ތަޢުލީމަކީ ދެމެހެއްޓެނިވި ތަރައްޤީއާއި ދުނިޔޭގެ ކުރިއެރުމުގެ ބިންގާކަން ހަނދާން ކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ފާހަގަކުރަމުންދާ ބައިނަލްއަޤްވާމީ ތަޢުލީމީ ދުވަހާއި ގުޅުވައިގެން ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައެވެ.

ރައީސް ވިދާޅުވީ ބައިނަލްއަޤްވާމީ ތަޢުލީމީ ދުވަސް ފާހަގަކުރަމުންދާއިރު، ތަޢުލީމަކީ ދެމެހެއްޓެނިވި ތަރައްޤީއާއި ދުނިޔެއަށް އަންނަ ކުރިއެރުމުގެ މައިގަނޑު ބިންގާކަން ހަނދާންކުރަންޖެހޭ ކަމަށެވެ.

އެމަނިކުފާނު ވިދާޅުވީ މިއަދު އަޅުގަނޑުމެން އާކުރަނީ، ތަޢުލީމީ ދާއިރާ ބިނާކުރުމުގައި ޒުވާނުންގެ ބައިވެރިވުން އިތުރުކޮށް، އެކުދިން ބާރުވެރިކުރުވުމަށާއި، އެންމެހައި ފަރާތްތަކަށް ބައިވެރިވެވޭ، ބޭނުންތެރި، އަދި ހެޔޮ ބަދަލުތަކެއް ފޯރުކޮށްދޭ ތަޢުލީމީ ނިޒާމެއް ކަށަވަރުކޮށްދިނުމަށް ވެފައިވާ ވަޢުދެއް ކަމަށެވެ.

މި ސަރުކާރުން ވަނީ ޤައުމީ ތަރައްޤީގެ އެންމެ މުހިންމު އަސާސަކީ ތަޢުލީމު ކަމުގައި ކަނޑައަޅާފައި ކަމަށާއި އެގޮތުން، ވޭތުވެދިޔަ ދެ އަހަރު ދުވަހުގެ ތެރޭގައި، ފުރަތަމަ ޑިގްރީ ސްކީމްގެ ދަށުން 6,000 އަށްވުރެ ގިނަ ދަރިވަރުން ވަނީ ތަޢުލީމު ޙާޞިލުކޮށް ދަސްވެނިވެފައި ކަމަށް އެމަނިކުފާނު ވިދާޅުވިވއެވެ.

މީގެ އިތުރުން އެމަނިކުފާނު ވިދާޅުވި ގޮތުގައި ދަރިވަރުންގެ ލޯނުގެ ގޮތުގައި 1 ބިލިއަނަށްވުރެ ގިނަ ދިވެހި ރުފިޔާ ވަނީ ދޫކުރެވިފައެވެ.

ރައީސް ވިދާޅުވީ ދަރިވަރުންގެ ކުރިއެރުމަށް މިކުރާ އިންވެސްޓްމަންޓްތަކާއި، ތަޢުލީމީ ފުރުޞަތުތައް ފުޅާކުރުމުގެ ސަބަބުން، ވަކިވަކި ފަރުދުންގެ މުސްތަޤްބަލު ބައްޓަންވުމުގެ އިތުރުން، މިއީ ފާގަތި، ހަމަހަމަ އަދި ހަރުދަނާ ޤައުމެއް ބިނާކުރުމަށް އެޅޭ ވަރުގަދަ ބިންގަލެއް ކަމަށެވެ.

އެންމެން ގުޅިގެން މަސައްކަތްކޮށްފިނަމަ، ކޮންމެ ދަރިވަރަކީވެސް ކާމިޔާބު މީހަކަށްވެ، ޤައުމީ ތަރައްޤީގައި ފުރިހަމައަށް ޙިއްޞާވެވޭނެ ފުރުޞަތު ކަށަވަރުކޮށްދެވޭނެ ކަމަށްވެސް އެމަނިކުފާނު ވިދާޅުވިއެވެ.