ގިނަ ސިޔާސީ ޕާޓީތަކެއް އެކުލެވިގެންވާ ނިޒާމެއް ރާއްޖެއަށް ތައާރަފް ވެގެން އައި ދުވަސްވަރު ޚިޔާލު ތަފާތުވުންތައް އުފެދި އެއްބަޑު އެއްބަފާ ކަމާއި އާއިލާތައް ރޫޅޭ ހިސާބަށް ދިޔަ ކަމަށާއި ނަމަވެސް މިއަދު ދިވެހީން ޑިމޮކްރަސީއަށް ދޮންވެ ފައްކާވެ، އޭގެ ބޭނުން ހިފަން އެނގިއްޖެ ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުޙައްމަދު އިސްމާޢިލް ވިދާޅުވެއްޖެއެވެ.
ކޮންގްރެސް ޕާޓީގެ ވިލިމާލޭ އޮފީސް ހުޅުވައި ކައުންސިލް އިންތިޚާބު ރަސްމީކޮށް ފެށުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން މުހައްމަދު ވިދާޅުވީ ޚިޔާލު ތަފާތުވުންތައް ހުއްޓަސް މިހާރު ދިވެހިންވަނީ ޑިމިކޮރަސީގެ ބޭނުން ހެޔޮ ގޮތުގައި ހިފަން ދަސްކޮށްފައި ކަމަށެވެ.
މުހައްމަދު ވިދާޅުވީ މާޒީގައި ސަރުކާރާ އިދިކީލަ ވިސްނުމުގެ ކައުންސިލުތަކުން އެކި ގޮތްގޮތުން ސަރުކާރަށް ދުއްތުރާކޮށް ޖެއްސުންކޮށް ދަތިކޮށްފައިވާ ކަމަށެވެ. އަދި ލާމަރުކަޒީ ގާނޫނުގެ ތެރެއިން ރައްޔިތުންނަށް ލިބިފައިވާ ޙައްޤުތައް ކަށަވަރު ހަމަ ގޮތުގައި ބޭނުން ކުރުމަށްޓަކައި ސަރުކާރަށް ނިސްބަތްވާ ކެނޑިޑޭޓުން އިންތިޚާބު ކުރަންޖެހޭ ކަމަށް އޭނާ ވިދާޅުވިއެވެ.
މާލޭ ސަރަހައްދަކީ ދިވެހިރާއްޖޭގެ އާބާދީ ދެބައިކުޅަ އެއްބައި ދިރިއުޅޭ ސަރަހައްދަށް ވުމުން، މި ސަރަހައްދުގެ ކުރިއެރުމާއި ތަރައްޤީއަށް ސަރުކާރުން ފަށާފައިވާ މަޝްރޫޢުތައް ކުރިއަށް ގެންދެވޭނީ ސަރުކާރަށް ތާއީދުކުރާ ކައުންސިލަރުންތަކެއް ތިބެގެން ކަމަށް މުޙައްމަދު ވިދާޅުވިއެވެ.
މުޙައްމަދުގެ ވާހަކައިގައި އިތުރަށް ވިދާޅުވީ ރައީސް ޑރ.މުޢިއްޒުގެ ވެރިކަމުގައި ތެރޭގައި މި ވޭތުވެދިޔަ ދުވަސްތަކުގައި ބައެއް ރަށްރަށާއި އަތޮޅު ކައުންސިލު ކައުންސިލުތަކުން ސަރުކާރަށް އެއްބާރުލުން ދިނުމުގެ ބަދަލުގައި، ރަށްރަށުގެ ތަރައްގީއަށްޓަކައި ސަރުކާރުން ކުރަމުންދާ މަސައްކަތްތަކަށް ދަތިކޮށް، މަޝްރޫޢުތައް ހުއްޓުވަން މަސައްކަތް ކޮށްފައިވާ ކަމަށެވެ.
ކުރިއަށް އޮތް ތަނުގައި ސަރުކާރަށް ޖެއްސުންކޮށް ރައްޔިތުންނަށް ސަރުކާރުން ކޮށްދޭން މަސައްކަތްތައް ހުއްޓުވިޔަ ނުދިނުމަށް، ސަރުކާރަށް އެއްބާރުލުން ދޭނެ ކައުންސިލަރުން އިންތިހާބުކުރުމަކީ ކޮންމެހެން ކުރަންޖެހޭ ކަމެއް ކަމަށް މުޙައްމަދު ވިދާޅުވިއެވެ.
"ރައީސް ޑރ. މުޙައްމަދު މުޢިއްޒުގެ ވެރިކަމަށް ދެ އަހަރާއި ދުވަސްކޮޅެއް ހިނގަމުންދާއިރު މިވެރިކަމުގެ ތެރޭގައިވެސް އަޅުގަނޑުމެންނަށް ފެނިގެންގޮސްފައިވަނީ ރަށްރަށުގެ އިދިކީލަ ކައުންސިލުތަކުން ވެރިކަމުގެ ނިޒާމުގެ ތެރެއަށް އުދަގޫކުރުމަށް ކޮށްފައި ހުރި މަސައްކަތްތައް. މިއީ ދެބަސްވެވޭނެ ހަގީގަތެއް ނޫން" މުޙައްމަދު ވިދާޅުވިއެވެ.
މީގެ އިތުރުން މުޙައްމަދު ވިދާޅުވީ ސަރުކާރަށް ތާއީދުކުރާ ކެންޑިޑޭޓުން އިންތިހާބުނުކުރެވިއްޖެނަމަ ވިލިމާލޭ ރައްޔިތުން ބޭނުންވާ ތަރައްގީ ނުގެނެވޭނެ ކަމަށެވެ. މީގެ ކުރިން އައި ސަރުކާރުތަކަށް ނުގެނެވުނު ތަރައްގީގެ ގިނަ މަޝްރޫއުތަކެއް ވިލިމާލެ އާއި މާލެ ސަރަހައްދަށް ރައީސް ޑރ.މުއިއްޒުގެ ވެރިކަމުގެ މިވީ މުއްދަތުގެ ތެރޭގައި ގެނެވިފައިވާ ކަމަށާއި އެ މަޝްރޫއުތައް ކުރިއަށްގެންދިއުމަށް އެހީތެރިވާނެ ކައުންސިލަރުން ހޮވުމަކީ ކޮންމެހެން ކުރަންޖެހޭ ކަމެއް ކަމަށް މުޙައްމަދު ވިދާޅުވިއެވެ.
