Advertisement

އެސް.ޑީ.އެފްގެ ހަނގުރާމަވެރިން ހަލަބުން ފައިބައިފި

January 11, 2026 އަޙްމަދު ފައިރޫޒް Avatar

News Image

ސީރިޔާގެ ހަލަބުގައި ހިނގަމުންދިޔަ ކުރިމަތިލުންތަކަކަށްފަހު، ކުރުދީންގެ ބާރު އޮންނަ ސީރިއަން ޑިމޮކްރެޓިކް ފޯސަސް (އެސް.ޑީ.އެފް) ގެ އެންމެ ފަހުގެ ހަނގުރާމަވެރިން އެ ސިޓީން ފައިބައިފިއެވެ.

މި ހަނގުރާމަވެރިން ހަލަބުން ފޭބީ، ދުވަސްތަކެއް ވަންދެން ހިނގި ނުރައްކާތެރި ހަމަލާ ބަދަލު ކުރުން ތަކަށްފަހު، އެމީހުން އެ ސިޓީން ރައްކާތެރިކަމާއެކު ނުކުތުމަށް ވެވުނު ސުލްހައިގެ އެއްބަސްވުމެއްގެ ދަށުންނެވެ.

ހަލަބުގެ ގަވަރުނަރު އައްޒާމް އަލްޣަރީބް އަލްޖަޒީރާއަށް މައުލޫމާތު ދެއްވަމުން ވިދާޅުވީ، ސަރުކާރުގެ ފައުޖުތަކުން ރޭގަނޑުގެ ވަގުތެއްގައި ބަސްތަކުގައި އެސް.ޑީ.އެފްގެ ހަނގުރާމަވެރިން ބޭރުކުރުމުގެ މަސައްކަތް ކުރުމާ ގުޅިގެން، މިހާރު އެ ސިޓީއަކީ އެ ޖަމާއަތުގެ ހަނގުރާމަވެރިން ނެތް ސިޓީއެއް ކަމަށެވެ.

އެސް.ޑީ.އެފްގެ ކޮމާންޑަރު މަޒްލޫމް އަބްދީ (މަޒްލޫމް ކޮބާނީ) ވިދާޅުވި ގޮތުގައި، ބައިނަލްއަގުވާމީ މެދުވެރިން މެދުވެރިކޮށް ވެވުނު މި އެއްބަސްވުމުގެ ދަށުން، އާންމުންނާއި ހަނގުރާމަވެރިން ރައްކާތެރިކަމާއެކު އެ ސިޓީން ބޭރުވުމުގެ ފުރުސަތު ވަނީ ލިބިފައެވެ.

އޭނާ އެކްސްގައި ކުރެއްވި ޕޯސްޓެއްގައި ވިދާޅުވީ، ހަލަބުގެ އަޝްރަފިއްޔާ އަދި ޝައިޚް މަގްސޫދު ސަރަހައްދުގައި ތިބި މަރުވެފައިވާ މީހުންނާއި، ޒަހަމްވެފައިވާ މީހުންގެ އިތުރުން، އެތަނުގައި ތާށިވެފައި ތިބި އާންމުންނާއި ހަނގުރާމަވެރިން ސީރިޔާގެ އުތުރާއި އިރުމަތީ ސަރަހައްދުތަކަށް ރައްކާތެރިކަމާއެކު ގެންދިއުމަށް މަގުފަހިވެފައިވާ ކަމަށެވެ. އަދި ހަމަލާތައް ހުއްޓުވުމަށާއި، ގެދޮރު ދޫކޮށް ދާންޖެހުނު މީހުން އަނބުރާ އައުމަށް މަގުފަހިކޮށްދިނުމަށް ވެފައިވާ ވައުދުތައް ފުއްދުމަށް މެދުވެރިންގެ ކިބައިން އޭނާ އެދިވަޑައިގަތެވެ.

މި ބަދަލުތައް އައިސްފައިވަނީ، އެސް.ޑީ.އެފްގެ ފައުޖުތައް ސީރިޔާގެ ގައުމީ ލަޝްކަރާ ގުޅުމަށް ކުރެވުނު މަޝްވަރާތައް ނާކާމިޔާބުވެ، ހިނގި ކުރިމަތިލުންތަކަށްފަހު ސީރިޔާގެ ސިފައިން ކުރުދީންގެ އަޣުލަބިއްޔަތު އޮންނަ ޝައިޚް މަގްސޫދު ސަރަހައްދު ކޮންޓްރޯލް ކުރުމާ ގުޅިގެންނެވެ. މި ކުރިމަތިލުންތަކުގައި މަދުވެގެން 30 މީހުން މަރުވެފައިވާއިރު، 150،000 އަށްވުރެ ގިނަ މީހުން ވަނީ ގެދޮރު ދޫކޮށް ދާންޖެހިފައެވެ.