މިދިޔަ ހަތަރު އަހަރުގެ ތަފާސް ހިސާބުތަކަށް ބަލާއިރު، މަތީ ތައުލީމަށް ކިޔަވާ ކުދިންގެ ތެރެއިން 75 އިންސައްތައަށްވުރެ ގިނަ ދަރިވަރުންނަށް، ފައިސާ ދޫކުރުމަށް ކަނޑައަޅާފައިވާ މުއްދަތުގެ ތެރޭގައި ފައިސާ ދޫކުރެވިފައިވާ ކަމަށް މިނިސްޓަރ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. އަލީ ހައިދަރު އަހްމަދު ވިދާޅުވެއްޖެއެވެ.

ރައީސް އޮފީހުގެ ތަރުޖަމާން ހީނާ ވަލީދު ކުރިއަށް ގެންދަވާ ޕޮޑްކާސްޓްގައި ވާހަކަދައްކަވަމުން މިނިސްޓަރު ހައިދަރު ވިދާޅުވީ، ދަރިވަރުންނަށް ފައިސާ ދޫކުރުމުގައި ލަސްތަކެއް ދިމާވާ މައިގަނޑު ސަބަބަކީ މިނިސްޓްރީއަށް ބޭނުންވާ ބައެއް ލިޔެކިޔުންތައް ދަރިވަރުންގެ ފަރާތުން ފުރިހަމައަށް ނުލިބުން ކަމަށެވެ. އަދި ފައިސާ ޖަމާކުރުމުގެ ކުރިން ވުޒާރާގެ ފަރާތުން ބަލަންޖެހޭ މާލީ އަދި އިދާރީ ކަންކަން ބެލުމަށް ވަގުތު ހޭދަވާކަންވެސް މިނިސްޓަރު ފާހަގަކުރެއްވިއެވެ.

" މިހާރު އުސޫލުގައި ކަމެއް ކަނޑައެޅިފައި އޮންނަ ކަމަށްވަންޏާ ދެ ކަމެއް ޔަޤީން ކުރަން. އެގޮތުން ކިޔަވަން ދޭތޯ ބެލުމާއި، ކުއްޖާ ދޭ މައުލޫމާތު ކަށަވަރު ކުރުން. ލޯނު ޕްރޮގްރާމްވެސް އެހެން ޕްރޮގްރާމުތަކުގައިވެސް ފައިސާ ދޫކުރުމުގެ ކަންކަން ދެމަސް ކުރިން އެބަފަށަން. ދެން ހަމަ ދެމަސް ކުރިން ފަށައިގެން އައިސް، ގިނަ ކުދިންނަށް 75 އިންސައްތަ ވަރު ޔަޤީންކަމާއެކު ފައިސާ ދެވޭ އޮންނަ މުއްދަތުގައި. " ވަޒީރު ވިދާޅުވިއެވެ.

ވަޒީރު ހައިދަރު އިތުރަށް ވިދާޅުވީ، ދަރިވަރުންނަށް ފައިސާ ދޫކުރުމުގެ ހުރިހާ މަރުހަލާއެއްވެސް ކުރިއަށް ގެންދަނީ ދައުލަތުގެ މާލިއްޔަތު ގަވާއިދާ އެއްގޮތްވާ ގޮތުގެ މަތިން ކަމަށެވެ. އެގޮތުން ހުރިހާ ލިޔެކިއުމެއް ފުރިހަމަ ނުވާނަމަ، ގަވާއިދު ތަންނުދޭތީ ފައިސާ ދޫނުކުރެވޭނެ ކަމަށް އެ މަނިކުފާނު ވިދާޅުވިއެވެ.

"އަޅުގަނޑުމެން ހޯދަންޖެހޭ ލިޔެކިޔުންތައް ބަރާބަރަށް ނުލިބިގެންނޭ އެހާ ހިސާބަށް ދަނީ. ނޫނީ އެއަށް ބޭނުންވާ އަދަދަށް ފައިސާ ދޫކުރެވެން އުސޫލުގެ ތެރެއިން ނެތީމަ އެކަންތައްތައް ދިގުލައިގެން ދިޔުމުގެ ތެރޭގައި ވެސް އެބަހުރެއޭ އެކަހަލަ މައްސަލަތައް ދިމާވެފައި،" މިނިސްޓަރު ވިދާޅުވިއެވެ.

މިނިސްޓަރުގެ ވާހަކަފުޅުގައި، ދަރިވަރުންނަށް ދޭންޖެހޭ ފައިސާ ވީހާވެސް އަވަހަށް ފޯރުކޮށްދިނުމަށް ސަރުކާރުން އިސްކަންދޭ ކަމަށާއި، ނަމަވެސް އެކަން ކުރަންވާނީ ކަނޑައެޅިފައިވާ އުސޫލުތަކުގެ ތެރެއިން ކަމަށްވެސް ވިދާޅުވިއެވެ.

ވުޒާރާއިން ހާމަކޮށްފައިވާ ގޮތުގައި ސްޓޫޑެންޓް ލޯނުގައި މި ވަގުތު ރާއްޖެ އާއި ރާއްޖެއިން ބޭރުގެ 36 ގައުމެއްގައި 1،740 ދަރިވަރުން ކިޔަވަމުންދެއެވެ. އަދި ސްކޮލާޝިޕްތަކުގައި 20 ގައުމެއްގައި 602 ދަރުވަރުން ދަނީ ތައުލީމު ހާސިލުކުރަމުންނެވެ.