އިސްރަށްވެހިންގެ ނާދީގެ މެންބަރުންގެ ތެރެއިން 55 އަހަރުން މަތީގެ ފަރާތްތަކަށް ޚާއްސަކޮށްގެން ބާއްވާ "ރަހަފަތް" މައުރަޒުގައި ބައިވެރިވުމުގެ ފުރުސަތު އިޖްތިމާޢީ އަދި އާއިލީ ތަރައްޤީއާ ބެހޭ ވުޒާރާއިން މިއަދު ހުޅުވާލައިފިއެވެ.

މި މައުރަޒަކީ ދިވެހި ސަގާފީ ކާބޯތަކެއްޗާއި، ޚާއްސަކޮށް ކުރިއަށް އޮތް ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން ބޭނުންކުރާ ދިވެހި ރަހަތައް ދައްކާލުމަށް ބާއްވާ ތަފާތު ހަރަކާތެކެވެ. އިޖްތިމާޢީ ވުޒާރާއިން މަޢުލޫމާތު ދޭ ގޮތުގައި، މި ހަރަކާތުގައި ބައިވެރިވެވޭނީ އިސްރަށްވެހިންގެ ނާދީގައި ރަޖިސްޓްރީވެފައިވާ 55 އަހަރުން މަތީގެ މެންބަރުންނަށެވެ. މި މައުރަޒު ބޭއްވުމަށް ހަމަޖެހިފައިވަނީ އަންނަ ފެބުރުވަރީ މަހުގެ 3 އިން 7 ވަނަ ދުވަހުގެ ނިޔަލަށެވެ.

މިފަދަ މައުރަޒެއް ބޭއްވުމުގެ މައިގަނޑު މަގްސަދަކީ ދިވެހި އަމިއްލަ ރަހަތައް އެއްތަނަކުން ތަޖުރިބާކޮށްލުމުގެ ފުރުސަތު އާންމުންނަށް ފޯރުކޮށްދިނުމެވެ. އަދި މައުރަޒަށް ޒިޔާރަތްކުރާ ފަރާތްތަކަށް ކާބޯތަކެތި ތައްޔާރުކުރާ ގޮތް ބަލާލުމުގެ އިތުރުން، އެ ތަކެއްޗާ ގުޅިފައިވާ ތާރީޚީ ވާހަކަތައް އިސްރަށްވެހިންގެ ފަރާތުން އަޑުއަހާލުމުގެ ފުރުސަތު ލިބިގެންދާނެ ކަމަށްވެސް އެ ވުޒާރާއިންބުނެއެވެ.

މައުރަޒުގައި ބައިވެރިވާން އެދޭ ފަރާތްތަކުން މި މަހުގެ 21 ވަނަ ދުވަހުގެ ނިޔަލަށް ނަން ނޯޓުކުރުމަށް ވަނީ ހުޅުވާލާފައެވެ. ނަން ނޯޓުކުރުމަށްޓަކައި ވުޒާރާއިން އާންމުކޮށްފައިވާ ކިއުއާރު ކޯޑު (QR Code) ބޭނުންކުރެވޭނެއެވެ. މީގެ އިތުރުން ފޯމު ފުރައިގެންނާއި، އެ ވުޒާރާގެ ނަންބަރު 3027586 ނުވަތަ 3027587 އަށް ގުޅައިގެންވެސް ނަން ނޯޓު ކުރެވޭނެ އިންތިޒާމު ވަނީ ހަމަޖެހިފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ބޮޑު ތަސައްވުރަކީ އޯގާތެރި މުޖުތަމަޢެއް ބިނާކޮށް، އުމުރުން ދުވަސްވީ މީހުންނަކީ އުފާވެރިކަމާއި، ހިތްހަމަޖެހުމާއި، ދުޅަހެޔޮކަންމަތީގައި ދިރިއުޅޭ ބައެއްކަން ކަށަވަރުކޮށްދިނުމެވެ. މި މައުރަޒަކީ އެ ތަސައްވުރުގެ ދަށުން އިސްރަށްވެހިންގެ ހުނަރުތައް ދައްކާލުމަށް ފަހިކޮށްދޭ މުހިންމު ފުރުސަތެކެވެ.