ކުޅިވަރުގެ އަޙްލާގު ދެމެހެއްޓުމުގައާއި ހަމަހަމަކަން ދެމެހެއްޓުމުގައި މުހިންމު ދައުރެއް އަދާކުރާނެ މުސްތަގިއްލު މުއަސަސާއެއްގެ ގޮތުގައި މޯލްޑިވްސް ނޭޝަނަލް އެންޓި ޑޯޕިންގ އެޖެންސީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފައްދަވައިފިއެވެ.
ޔުނެސްކޯ ކޮންވެންޝަނާއި ވޯލްޑް އެންޓި ޑޯޕިން ކޯޑާއި އެއްގޮތްވާގޮތުގެ މަތިން ރާއްޖޭގައި ޤާއިމުކުރެވުނު މޯލްޑިވްސް ނޭޝަނަލް އެންޓި ޑޯޕިން އެޖެންސީއަށް ރަސްމީ ހައިސިއްޔަތު ދީފައިވަނީ މިއަދު ރައީސް ނެރުއްވާފައިވާ ދެންނެވުމަކުންނެވެ.
އެ އިދާރާ ހިނގަމުންދާނީ ޤާނޫނު ނަންބަރު 2015/30 ގެ 38ވަނަ މާއްދާގެ (ހ)ގައި ބަޔާންކޮށްފައިވާ ފަދައިން، ކުޅިވަރުގެ މައިދާނުގައި ޑޯޕިންގ ކޮންޓްރޯލްކުރުމުގެ ސިޔާސަތުތައް ތަންފީޒުކުރުމަށްޓަކައި ކަނޑައެޅޭ މުސްތަޤިއްލު ބޯޑެއްގެ ދަށުން ކަމުން ކަމަށް ރައީސް އޮފީހުން ބުނެއެވެ. ނަމަވެސް އިދާރީ ގޮތުން އެ މުއަސަސާ ހިނގަމުން ދާނީ ސްޕޯޓްސް، ފިޓްނަސް އެންޑް ރެކްރިއޭޝަންގެ ދަށުން ކަމަށްވެއެވެ.
މޯލްޑިވްސް ނޭޝަނަލް އެންޓި ޑޯޕިންގ އެޖެންސީގެ މަޤްޞަދަކީ ޔުނެސްކޯ ކޮންވެންޝަނާއި ވޯލްޑް އެންޓި ޑޯޕިންގ އެޖެންސީގެ ކޯޑާ އެއްގޮތްވާ ގޮތުގެމަތިން ޑޯޕިންގ ކޮންޓްރޯލްކުރުމުގެ މުހިންމުކަން ދިވެހިރާއްޖޭގެ ހުރިހާ ކުޅުންތެރިންނަށާއި ކުޅިވަރުގެ ދާއިރާތަކުގައި ޙަރަކާތްތެރިވާ ހުރިހާ ފަރާތްތަކަށް އަންގައިދީ، ކުޅިވަރުގެ ދާއިރާއިން ޑޯޕިންގ ފިލުވާލާ، މިރޮނގުން ބޭނުންވާ މީހުން ތަމްރީނުކޮށް، މިރޮނގުން ކުރިއަށް ދެވެންހުރި ފުރުޞަތުތައް ފަހިކޮށްދިނުމެވެ. އަދި ޑޯޕިންގ ކޮންޓްރޯލް އޮފިސަރުންނަށް ހޯދައިދީ، ޓެސްޓު ކުރެވޭނެ ގޮތްތައް ރާވައި، މިފަދަ ކަންކަން ތަރައްޤީ ކުރެވެންހުރި ގޮތްތައް ބަލައި، އެފަދަ ކުރިއެރުންތައް ހޯދައިދިނުންވެސް އެޖެންސީގެ މަގްސަދުތަކުގެ ތެރޭގައި ހިމެނެއެވެ.
މީގެ ކުރިން އެންޓި ޑޯޕިން އެޖެންސީ ހިންގަމުން އައި ގޮތަށް އިޝާރާތް ކުރައްވާ ރައީސް ވިދާޅުވެފައި ވަނީ "މިހާތަނަށް މިއީ ހަމަ ކުޑަކުޑަ ޑެސްކެއް ޤާއިމުކުރެވި، އާދައިގެ ގޮތަކަށް ހައިސިއްޔަތު ދެވިފައިވާ ފަރާތެއް، އެހެންނަމަވެސް މިހާރު މުސްތަގިއްލުކަން ދެވުނީމަ އޭގެ ސަބަބުން ކުޅިވަރުގެ ޑިސިޕްލިން ރަނގަޅު ކުރުމުގައި ވަރަށް ބޮޑަށް ބާރުއެޅިގެންދާނެ" ކަމަށެވެ.