ސަރުކާރުން ވަޒީފާއެއް ދޭ ނަމަ ފުރަތަމަ ތަރުބަވީ ތަމްރީނުގެ ތެރެއިން އަސްކަރީ ތަމްރީނަށް ފޮނުވަންވީ ކަމަށާއި ރަނގަޅަށް އެ ތަމްރީން ނަހަދާ ފަރާތަކަށް ސަރުކާރުގެ ނުވަތަ ސިވިލް ސާވިސްގެ އެއްވެސް ވަޒީފާއެއް ނުދޭންވީ ކަމަށް ހުޅުމާލެ އުތުރު ދާއިރާގެ ރައްޔިތުންގެ މަޖިލިހުގެ މެންބަރު ހުސައިން ޝަރީފް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހަށް ހުށަހަޅާފައިވާ ވަޒީފާއާ ބެހޭ ގާނޫނުގެ އިސްލާހަށް ބަހުސް ކުރައްވަމުން ޝަރީފް ވިދާޅުވީ، ސިވިލް ސާވިސްގެ ވަޒީފާ ނުވަތަ ސަރުކާރުން ވަޒީފާ ދިނުމުގައި އަސްކަރީ ތަމްރީނު ފުރިހަމަ ކުރާ މީހުންނަށް ނޫނީ ވަޒީފާ ނުދޭ ގޮތަށް ގާނޫނަށް ބަދަލު ގެންނަން ޖެހޭ ކަމަށެވެ.
ޝަރީފް ވިދާޅުވީ އެކު ކަހަލަ ވަޒީފާތަކަށް ނުކުންނަ ޒުވާނުންގެ ސެޓްފިކެޓް ވަރަށް ފުރިހަމަ ކަމަށެވެ. އަދި ނަތީޖާ ވެސް ރަނގަޅު ކަމަށާއި އެކަމަކު، ވަޒީފާ އަށް ނުކުންނައިރު، އެ ހިދުމަތް ފޯރުކޮށްދެވޭތޯ އެއީ މިއަދު އުފައްދަން ޖެހޭ ސުވާލެއް ކަމަށް އޭނާ ވިދާޅުވިއެވެ.
ރައްޔިތުންނަށް ރަނގަޅު ހިދުމަތެއް ފޯރުކޮށްދެވޭނީ މުވައްޒަފުންގެ ހުރިހާ ކަމެއް އިސްލާހު ވެގެން ކަމަށާއި ރާއްޖޭގައި އޯލެވެލް އަދި އޭލެވެލް ހަދާ ހުރިހާ ދަރިވަރުންނަށް އަސްކަރީ ތަމްރީނެއް ސަރުކާރުން ހިންގުން މުހިންމު ކަމަށް ޝަރީފް ވިދާޅުވިއެވެ.
"ސަރުކާރުން ވަޒީފާއެއް ދޭނަމަ ފުރަތަމަ ތަރުބަވީ ތަމްރީނުގައި ހަމަ މިލިޓަރީ ޓްރެއިނިން އަށް ފޮނުވަންވީ. ރަނގަޅަށް މިލިޓަރީ ޓްރައިނިން އަށް ފޮނުވާފައި އެ ނަހަދާނަމަ ސަރުކާރުގެ އެއްވެސް ވަޒީފާއެއް ނުދޭންވީ،" ޝަރީފް ވިދާޅުވި އެވެ.
ޝަރީފް އިތުރަށް ވިދާޅުވި ގޮތުގައި ކުރިން މައުހަދުން ކިޔެވި ދަރިވަރުންނަކީ އަހުލާގު ރަނގަޅު ކިޔަމަންތެރި އަދި ވެރިންނަށް ކަމޭހިތާ ބައެއް ކަމީ ފެންނަން އޮތް ހަގީގަތެކެވެ. އަދި މައުހަދުން ނުކުތް ދަރިވަރުންނަކީ ވަޒީފާގެ މާހައުލުގައި ވެސް ވަފާތެރިކަމާއި އަމާންނާތްތެރިކަމާ އެކު، ވެރިންނަށް ކިޔަމަންތެރިކަން އަދާކުރަމުން އަންނަ ބައެކެވެ.
ވަޒީފާ ދިނުމުގެ ކުރިން އަސްކަރީ ތަމްރީން ދޭ ވަހަކަ ޝަރީފް ވިދާޅުވިއިރު "ދިވެހި ވަތަނީ ޚިދުމަތް" ގެ ގޮތުގައި މިހާރު ވެސް މި ސަރުކާރުން އެފަދަ ޕްރޮގްރާމެއް ކުރިއަށް ގެންދެއެވެ.
ދިވެހި ވަތަނީ ޚިދުމަތަކީ ދިވެހިރާއްޖޭގެ ޒުވާން ޖީލަކީ ހަރުދަނާ، އަޚުލާޤީ ގޮތުން ސާފުތާހިރު، އަދި ޤައުމިއްޔަތުގެ މަތިވެރި ސިފަތަކުން ޒީނަތްތެރިވެފައިވާ ބަޔަކަށް ހެދުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައިގެން ފެއްޓެވި ތާރީޚީ ޕްރޮގްރާމެކެވެ. މި ޕްރޮގްރާމްގެ މައިގަނޑު މަޤްޞަދަކީ އިސްލާމްދީނުގެ މަތިވެރި އުޞޫލުތަކަށް ބޯލަނބާ، ޤައުމަށް ދިމާވާ ކޮންމެ ކާރިސާއެއްގައި އިސްސަފަށް ނިކުމެ ޚިދުމަތްކުރާނެ ހުނަރުވެރި ޒުވާނުންތަކެއް ބިނާކުރުމެވެ.
ދެހާސް ސައުވީސް ވަނަ އަހަރުގެ ނަޞްރުގެ ދުވަހުގެ ރަސްމީ ޖަލްސާގައި މި ޕްރޮގްރާމް އިޢުލާނުކުރެއްވުމަށްފަހު، 2025 ވަނަ އަހަރުގެ އޮކްޓޯބަރު މަހު ވަނީ މި ޚިދުމަތް ރަސްމީކޮށް ފަށާފައެވެ.
އެ ޕްރޮގްރާމްގައި ބައިވެރިވި ޒުވާނުންނަށް ސަރުކާރުން ވަޒީފާ ވެސް ހަމަޖައްސައިދިނެވެ. އަދި ސަރުކާރުގެ ފަރާތުން ވަނީ އެ ޕްރޮގްރާމްއާ ގުޅޭ ވަކި ގާނޫނެއް ހަދަން މަޖިލީހަށް ބިލެއް ވެސް ހުށަހަޅައިފަ އެވެ.