ރާއްޖޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވާފައިވާ "ރަސްމާލެ" މަޝްރޫޢުގެ ދަށުން، ސައިޓް އޭގެ ބިން ހިއްކުމުގެ ބޮޑު ބައެއް ނިމިފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ.

އެމްއޭސީއެލްއިން މި މަޝްރޫޢުގެ އެންމެ ފަހުގެ މަޢުލޫމާތު ހިއްސާކުރަމުން ބުނީ، ސައިޓް އޭ އިން ހިއްކުމަށް ހަމަޖެހިފައިވާ 137.5 ހެކްޓަރުގެ ތެރެއިން މިހާތަނަށް 71 ހެކްޓަރުގެ ބިން ހިއްކާ އެއްކޮށް ނިމިފައިވާ ކަމަށެވެ. މިއީ އެ ސައިޓުގެ ޖުމްލަ މަސައްކަތުގެ 51.64 އިންސައްތައެވެ.

ރަސްމާލެ މަޝްރޫޢުގެ ދަށުން ޖުމްލަ 1009 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިޔަ މަޝްރޫޢު ކުރިއަށްގެންދަނީ ޖުމްލަ 12 ސަރަޙައްދަކަށް ބަހާލައިގެން، ތިން ފަރާތަކާ ހަވާލުކޮށްގެންނެވެ. މިހާރު ކުރިއަށްދާ ރިކްލެމޭޝަން އޮޕަރޭޝަންތަކަކީ ޖާން ޑި ނަލް ކުންފުނިން ހިންގާ، ދުނިޔޭގެ އެންމެ ބޮޑު ދެ ޑްރެޖަރުގެ ތެރޭގައި ހިމެނޭ "ކްރިސްޓޮބަލް ކޮލޯން" ބޭނުންކޮށްގެން، އިންޖިނިއަރިންގ މިންގަނޑުތަކާ އެއްގޮތަށް ކުރިއަށްދާ މަސައްކަތްތަކެއް ކަމަށް އެމްއޭސީއެލްއިން ފާހަގަކުރެއެވެ.

މިދިޔަ އަހަރުގެ ޑިސެންބަރު މަހުގެ 18 ވަނަ ދުވަހު ފެށި ރަސްމާލެ ހިއްކުމުގެ މަޝްރޫޢުގެ ތެރެއިން، ސައިޓް އޭގެ މަސައްކަތް އަމަލީގޮތުން ފަށާފައިވަނީ މިދިޔަ މަހުގެ 1 ވަނަ ދުވަހުއެވެ. ވަރަށް ހަލުވި މިނެއްގައި ކުރިއަށްދާ މި މަޝްރޫޢަކީ މާލެ ސަރަޙައްދުގެ ތޮއްޖެހުން ކުޑަކޮށް، ރައްޔިތުންނަށް ފެންވަރު ރަނގަޅު ބޯހިޔާވަހިކަން ފޯރުކޮށްދިނުމަށް ސަރުކާރުން ކުރިއަށްގެންދާ އެންމެ މުހިންމު އެއް މަޝްރޫޢެވެ.